Қизилқумнинг қадим оҳанглари бор. Отларнинг дупурига ҳамоҳанг дўмбира садоси, тун қаърида кенгликларни тилиб ўтаётган чўпон найининг ноласи инсонни олис-олисларга етаклайди. Бу анъанавий санъат — чўлни ватан тутган халқларнинг мусиқий хотираси, қалб оҳанги, маънавий бойлигидир. Уни асраб-авайлаш, тарғиб этиш ва ёш авлодга етказиш эса ҳар бир ижод масканининг шарафли вазифаси ҳисобланади. «Навоий кон-металлургия комбинати жамғармаси» давлат муассасаси ҳам бу йўналишда қатор хайрли ишлар амалга оширмоқда.

Ана шундай хайрли ташаббуслардан бири — анъанавий «Қизилқум оҳанглари» кўрик-танловидир. У ёш истеъдодларга ўз маҳоратларини намойиш этиш учун ўзига хос саҳна бўлиб келмоқда ва ҳар йили янги иқтидорларни кашф этишга хизмат қилмоқда.

Жорий йилги «Қизилқум оҳанглари – 2025» кўрик-танловига жамғарманинг «Фарҳод» маданият саройи мезбонлик қилди. Тадбир давлат муассасаси тасарруфидаги барча маданият масканлари ижрочилари, ижодий жамоалари, ёш истеъдодлар ва маҳорати баланд устозларни бир саҳнага жамлади.

Танлов икки босқичда ўтказилди. Биринчи босқичда анъанавий чолғулар ансамбллари ва созандаларнинг 10 та, катта ва кичик ёш тоифасидаги хонандаларнинг 15 та чиқиши тингланди. Иккинчи босқичда эса иштирокчилар бастакорлар ижодидан биттадан асар ижро этиб, ўз маҳоратларини янада чуқурроқ намойиш қилишди.

Чиқишлар Ўзбекистон халқ артисти Замира Суюнова ва Ўзбекистонда хизмат кўрсатган артист Илёс Арабов раҳбарлигидаги тажрибали ҳакамлар ҳайъати томонидан баҳоланди.

— Танловда ҳакамлар ҳайъати раиси сифатида иштирок этиб, анъанавий ижрочилик санъатига берилаётган эътиборни кўриб, чин маънода қувондим, — дейди Замира Суюнова. — Истеъдодларни тингладик, қувондик, баъзан масъулиятли дақиқаларда қийналдик ҳам. Аммо ҳар бир иштирокчига чуқур миннатдорчилик билдираман.

Тадбир давомида яккахон ижрочилар, ансамбллар, созандалар ва уларга ҳамроҳ устоз-мураббийлар учун барча қулайликлар яратилди. Ташкилотчилар томонидан иштирокчилар ўртасидаги дўстликни мустаҳкамлаш мақсадида НКМК касаба уюшмаси Кенгаши «Дўстлик оқшоми»ни ўтказди.

Танлов натижаларига кўра, анъанавий чолғулар ансамбли йўналишида «Фарҳод» маданият саройининг «Сарахбор» мақомчилар ансамбли ғолибликка сазовор бўлди. Уларнинг саҳнадаги уйғунлиги, куйларнинг нозик талқини ва миллий ижрочилик мактабига хос босиқлиги томошабинлар ҳамда ҳакамлар ҳайъати томонидан юқори баҳоланди.

Кичик ёш тоифасида «Учқудуқ» маданият саройи иштирокчиси Азизбек Исомиддинов ўзининг жарангдор овози ва саҳнадаги эркинлиги билан ажралиб турди. Катта ёш тоифасида эса «Зафаробод» ҳудудий бошқармасининг Пахтачи тумани «Шодлик» клуби аъзоси Маржона Отақулова ижро этган қўшиқлар композицияси, оҳанг ва сўз мазмунининг уйғунлиги билан томошабинларга чуқур маънавий завқ улашди.

Темур ЭШБОЕВ, «Халқ сўзи».