Архив фото

Россия президенти Владимир Путин Украинадаги урушни тўхтатиш доирасидаги сулҳга бугун жавоб бериши мумкин.

Кремль матбуот котиби Дмитрий Песковнинг сўзларига кўра, Путин Москвада Беларусь президенти Александр Лукашенко билан учрашувдан сўнг қўшма матбуот анжуманидан иштирок этади. Айни шу тадбирда Путин Украина ҳақида гапириши мумкин. Шундай қилиб, Россия томонидан АҚШ ва Украина таклифига муносабат билдириш тўғрисида қарор аллақачон қабул қилинган.

“Путин Россиянинг Беларусь билан муносабатларига тааллуқли бўлмаган мавзуларга ҳам изоҳ берадими?”, деган саволга Песков ҳамма нарса журналистларнинг саволларига боғлиқ эканлигини айтган.

“Bild” нашрига кўра, сулҳга «ҳа» деган жавобни олиш осон эмас. Кеча Путиннинг Курск вилоятида пайдо бўлиши шундан далолат берадики, у бу ҳудудни бутунлай қайтариб олишга чақирди ва шу билан бирга асирга олинган украиналик аскарлар террорчи сифатида кўрилишини эълон қилди. Бундан ташқари, “Bloomberg”, “Reuters” ва бошқа нашрлар ўз манбаларига таяниб, Россия сулҳга бир қатор шартларни қўйиши мумкинлигини ёзди.

Владимир Зеленский ҳам ўз иттифоқчиларини Москвага босим ўтказишга чақирди.

«Биз тинчлик сари ҳаракат қилишимиз керак. Хавфсизлик кафолатларини яратишимиз керак, халқимизни озод қилишимиз керак. Энг муҳими, шерикларимизнинг Россия алдашига эмас, балки урушни тугатишга тайёр бўлишини таъминлаш керак», — деган Зеленский.