Фото: Коммерсантъ

Россия президенти Владимир Путин мамлакат қуролли кучлари сафига баҳорги чақирув тўғрисидаги фармонни имзолади. Россия етакчиси томонидан 31 март куни имзоланган ҳужжатга кўра, чақирув кампанияси 1 апрелдан бошланади ва 15 июлга қадар давом этади. Унинг доирасида 18 ёшдан 30 ёшгача бўлган 160 минг фуқаро ҳарбий хизматга чақирилиши керак. Шу билан бирга ўтган йилнинг баҳорида Россия Қуролли Кучлари сафига чақирилган ҳарбий хизматчилар ҳарбий хизматдан бўшатилади.

Россия ҳукумати, ҳудудлар ижроия ҳокимияти ва ҳарбий комиссарликларга чақирув тадбирларини амалга ошириш учун масъул этиб белгиланган. Фармон имзоланган пайтдан бошлаб кучга кирган.

Мудофаа вазирлиги чақирилувчиларга чақирув қоғозларини юбориш тартибини ҳам тушунтирди. Россия Қуролли Кучлари Бош штаби Бош ташкилий ва сафарбарлик бошқармаси бошлиғининг ўринбосари, вице-адмирал Владимир Цимлянскийнинг таъкидлашича, яқинда мамлакатда чақирилувчиларга чақирув қоғозларини юборишнинг янги тартиби жорий қилинган. Унинг тушунтиришича, электрон чақирув қоғозлари фуқароларга Давлат хизматлари портали ёки mos.ru сайти орқали юборилади. Шу билан бирга, вазирлик чақирилувчиларга оқ ва қизил конвертларда чақирув қоғозларини юборишда давом этади.

“Улар юридик аҳамиятга эга ва жўнатилади”, — деди Цимлянский.

Баҳорги чақирув бошланиши фонида Мудофаа вазирлиги чақирилувчилар Украинадаги “махсус ҳарбий операция” топшириқларини бажаришга жалб этилмаслигини таъкидламоқда. Яъни чақирув Украинадаги кампания билан боғлиқ эмаслигини қўшимча қилинди.

Россияда ҳарбий хизматга чақириш қоидалари ўзгартирилди

Шу йилнинг март ойи охирида «Парламент газетаси» мамлакатда 1 апрелдан ҳарбий хизматга чақириш қоидалари ўзгаришини ёзди. Хусусан, баҳорда ҳали ўз бўлинмаларига жўнатилмаган чақирилувчилар кузда манзилига жўнатилиши айтилган эди. Кейин яна бир янгилик – муддатли ҳарбий хизматга чақирилувчиларнинг ягона реестрининг ишга туширилиши билан боғлиқ. Бундан ташқари, муқобил вариантда хизмат қилиш учун касблар рўйхати кенгайтирилиши мумкин.

Масалан, расмийлар муддатли ҳарбий хизматга чақирилганларни заводларга юборишни таклиф қилишди. Гап ҳарбий қисмлардан ташқарида хизмат қилишни танлаган фуқаролар ҳақида бормоқда. Бу ташаббусни давлат мудофаа буюртмалари ҳажмини ошириш зарурати билан изоҳланган. Шунингдек, бугунги кунда ҳарбий-саноат мажмуасига кирувчи кўплаб корхоналарда кадрлар етишмовчилиги кузатилаётгани ва бу чора ушбу муаммони ҳал қилишга ёрдам беришини таъкидланди.

Яқинда Давлат Думаси биринчи ўқишда ҳарбий хизматга чақириш тўғрисидаги қарор қабул қилинган кундан бошлаб бир йил ичида, агар у ҳарбий хизматга чақириш пайтида бажарилмаган бўлса, ижро этилишини назарда тутувчи қонун лойиҳасини қабул қилди. Кейин Дума ҳарбий рўйхатга олиш ва рўйхатга олиш бўлимининг хабарисиз кўчиб ўтиш учун жарималар тўғрисидаги қонун лойиҳасини ҳам биринчи ўқишда маъқуллади. Бундай фуқаролар 10 мингдан 20 минг рублгача жарима тўлайди.