Иллюстратив фото

Бугун, 25 февраль куни Ўзбекистоннинг 9 та вилоятида кучли шамол эсиши, чанг-тўзон кузатилиши кутилмоқда. Бу ҳақда «Ўзгидромет» агентлиги хабар берди.

Унга кўра, бугун кундуз куни Хоразм, Бухоро, Навоий, Тошкент, Самарқанд, Жиззах, Сирдарё, Қашқадарё, Сурхондарё вилоятларида баъзи жойларда шамол тезлиги 13-18 метр/секундгача кучаяди, айрим жойларда баъзида 20-23 метр/секундгача кучайиши, чанг-тўзонлар билан кузатилиши мумкин.

Тошкент шаҳрида кечга томон шамол тезлиги 12-15 метр/секундгача кучаяди, чанг-тўзонлар кузатилиши эҳтимоли бор.

Прогнозларга кўра, Қорақалпоғистон Республикаси, Хоразм, Бухоро, Навоий вилоятларида ёмғир ёғади, шимолда ҳам ёмғир, қор кўринишидаги ёғингарчилик кузатилади. Самарқанд, Жиззах, Қашқадарё вилоятларида эса кечга томон баъзи жойларда ёмғир ёғади. Республиканинг қолган ҳудудларида ёғингарчилик кутилмайди. Ҳарорат 18-23 даража илиқ, шимолда 0-5 даража илиқ бўлади.

Республиканинг тоғ олди ва тоғли ҳудудларида баъзи жойларда ёғингарчилик (ёмғир, қор) бўлади, туман тушиши кутилмоқда. Тошкент ва Наманган вилоятларининг тоғли ҳудудларида қор кўчиши хавфи бор. Шунингдек, сел-сув тошқин ҳодисалари ҳам юзага келиши мумкин.