Фото: DW

Ўзбекистонлик мактаб ўқувчиси Раёна Иброҳимова Германиянинг Гёттинген шаҳрида ўтказилган жаҳон немис тили олимпиадасида олтин медални қўлга киритди. Бу ҳақда Олмониянинг энг машҳур «Deutsche Welle» нашри хабар берди.

Маълум қилинишича, 15-22 июль кунлари бўлиб ўтган мусобақада 62 давлатдан юздан ортиқ иштирокчилар қатнашди. Раёна биринчи ўринни ёлғиз ўзи эгалламади, хусусан, бангладешлик Маҳек Хон ва Шимолий македониялик Ана Котевска ҳам ўзбек қизи билан бир хил натижа кўрсата олишган.

Гёте Институти томонидан ўтказилган турнирда кумуш ва бронза медаллари Мексика, Италия, Словакия, Польша ва Буюк Британиядан келган иштирокчиларга насиб қилган. Финал босқичида 14 ёшдан 17 ёшгача бўлган 100 нафардан ортиқ ёшлар иштирок этди.

Қайд этилишича, Иброҳимова турли вазифаларни, жумладан, немис тилида онлайн саҳифа яратиш, тақдимотлар ўтказиш ва гуруҳ билан ишлашда муваффақият қозониб, ҳакамлар эътирофига сазовор бўла олган. «16 ёшли Раёна Германиядаги университетлардан бирида немис тилини ўрганишни ва таржимон бўлишни режалаштирмоқда», дейилади хабарда.

Бутунжаҳон немис тили олимпиадаси ҳар икки йилда бир марта ўтказилади ва у бутун дунё бўйлаб мактабларда немис тилини ўрганишни ривожлантиришга қаратилган дастур ҳисобланади.

Аввалроқ, Президент қарори билан Тошкентда Америка технологиялар университети ташкил этилиши ҳақида хабар берилганди.