Нуфузли Quacquarelli Symonds халқаро рейтинг агентлиги (QS) дунёнинг энг яхши университетлари рейтингини (World University Rankings 2025) эълон қилди.

Мазкур рўйхатда дунёнинг турли давлатларида фаолият юритадиган олийгоҳларнинг 1500 таси киритилган бўлиб, рейтинг 105 та олий таълим тизими бўйича ишлаб чиқилган.

Эътиборлиси, бу рейтингга Ўзбекистоннинг 2 та олийгоҳи ҳам киритилган. Улар – Тошкент ирригация ва қишлоқ хўжалигини механизациялаш муҳандислари институти Миллий тадқиқот университети (547-ўрин) ва Мирзо Улуғбек номидаги Ўзбекистон миллий университети (781–790-ўрин).

Аниқланишича, ТИҚХММИ Миллий тадқиқот университети «Академик нуфуз» кўрсаткичи бўйича дунёнинг энг яхши 300 та олий ўқув юртлари қаторига, шунингдек, Марказий Осиёдаги энг яхши университетлар учлигига кирган.

Ўзбекистон миллий университети эса «Чет эллик ўқитувчилар улуши» кўрсаткичи бўйича дунёнинг 200 та энг яхши университетлари қаторидан жой олган. Марказий Осиёда ҳам бу олийгоҳ иккинчи ўринни қайд этган.

Маълумот ўрнида, рейтингда Америка Қўшма Штатлари энг кўп вакиллик қилинган мамлакат сифатида тилга олинган. Мазкур давлатдан 197 та ОТМ ушбу рўйхатга киритилган.