Иллюстратив фото

Ўтган ҳафта охирида юртимизда электр энергиясининг суткалик истеъмоли бўйича янги рекорди қайд этилди. Бу ҳақда Энергетика вазирлигининг Жамоатчилик билан алоқалар бўлими бошлиғи Дилдора Хашимова маълум қилди.

Қайд этилишича, 2026 йил 24 январь куни электр энергияси суткалик истеъмоли 283 миллион кВт соатни (кичик қувватли қуёш генерациясини ҳисобга олмаганда) ташкил этган. Таққослаш учун, 2025 йилнинг қиш мавсумида энг юқори суткалик истеъмол 11 январь куни кузатилиб, 271,8 млн кВт соатни ташкил этган эди.

Шунингдек, 2025 йилнинг ёз мавсумида, жумладан июль ойида электр энергияси суткалик истеъмолининг энг юқори кўрсаткичи 272,6 млн кВт соатга етган. Тезкор маълумотга асосан, ўтган шанба куни бу рекорд янгиланиб, 283 млн кВт соат бўлди.

Кеча, 25 январь куни электр станциялари орқали жами 264,2 млн кВт соат, режадагига нисбатан 103 фоиз кўп электр энергияси ишлаб чиқарилган.

Республика истеъмолчиларига 246,9 млн кВт соат, режадагига нисбатан 103 фоиз кўп электр энергияси етказиб берилган.

Табиий газ истеъмоли 144,7 млн куб метрни ташкил қилган. Автомобилларга газ тўлдириш компрессор шохобчаларига махсус техникалар ва жамоат транспортлари учун кунлик 1,5 млн куб метр табиий газ етказиб берилган.

Хусусан, табиий газни ҳисобга олиш ва назорат қилишнинг автоматлаштирилган тизимидан олинган маълумотларга кўра, Фарғона водийсидаги махсус техникалар ва жамоат транспортлари учун жами 81 813 куб метр табиий газ етказиб берилган.

Аҳоли ва ижтимоий соҳа объектлари учун 2 минг 300 тонна (режага нисбатан 109 фоиз кўп) суюлтирилган газ ишлаб чиқарилган, 500 тонна етказиб берилган. Ҳудудлардаги газ тўлдириш шохобчаларидаги суюлтирилган газ захираси 2 тоннага ошиб, 6,7 минг тоннага етган.

Кеча, 25 январь куни электр қурилмаларида юзага келган 5 та, газ таъминотида эса 1 та носозлик авария бригадалари томонидан тезкорлик билан бартараф этилган. Тизимда 24/7 режимида кучайтирилган тартибда иш олиб борилмоқда.

Электр ва газ таъминоти корхоналарида жами 1 минг 479 та махсус бригада ташкил этилган, ушбу бригадалар таркибида 7 минг 596 нафар ишчи-ходим жойларда кеча-ю кундуз фаолият юритиб бормоқда.