Илгари хабар берганимиздек, Олий Мажлис Сенати Раиси Танзила Нарбаева бошчилигидаги делегация Женева шаҳрида бўлиб турибди. Делегация аъзолари Парламентлараро иттифоқнинг 151-ассамблеяси доирасида турли мавзудаги дебатлар ва сессияларда иштирок этмоқда.

Жумладан, Сенатнинг Фан, таълим ва соғлиқни сақлаш масалалари қўмитаси раиси ўринбосари Орал Атаниязова БМТнинг Озиқ-овқат ва қишлоқ хўжалиги ташкилоти (ФАО) томонидан Парламентлараро иттифоқ билан ҳамкорликда ташкил этилган «Дунёда озиқ-овқат хавфсизлиги» мавзусидаги семинарда иштирок этди.

Муҳокама чоғида ФАОнинг йиллик ҳисоботи маълумотлари тақдим этилди, унга кўра очликка қарши курашиш ва озиқ-овқат таъминоти масалалари ҳамон долзарблигича қолмоқда. Дунёда, шу жумладан, Ўзбекистонда ҳам эришилган ютуқларга қарамай, Барқарор ривожланиш мақсадларига, айниқса, тўйиб овқатланмасликнинг барча шаклларига барҳам беришга қаратилган вазифаларга эришиш учун жаҳон ҳамжамияти катта ишларни амалга ошириши лозимлиги таъкидланди.

Иштирокчилар соғлом овқатланиш ғояларини илгари суриш, таълим муассасаларида овқатланиш сифатини яхшилаш, шунингдек, ёшликдан тўғри овқатланиш маданиятини шакллантиришда парламент аъзоларининг муҳим ролини таъкидлади.

Шу билан бирга, сенатор иқлим ўзгариши, озиқ-овқат хавфсизлиги ва тамаки истеъмол қилишга қарши курашиш масалаларига бағишланган сессияларда иштирок этди.