Бугун Ўзбекистон U-18 хоккей терма жамоаси ўз тарихида биринчи марта Жаҳон чемпионатида иштирок этади. Мусобақа Таиландда ўтказилаётган бўлиб, терма жамоамиз III дивизионнинг «B» гуруҳида рақобат олиб боради. Ёш хоккейчиларимиз учун ушбу чемпионат тарихий аҳамиятга эга бўлиб, уларнинг илк рақиби Жанубий Африка Республикаси (ЖАР) терма жамоаси бўлади.

Чемпионатда муваффақиятли иштирок этиш Ўзбекистон У-18 жамоаси учун муҳим аҳамият касб этади. Агар ёшларимиз 1-ўринни қўлга киритишса, келгуси йилда III дивизионнинг «А» гуруҳида иштирок этиш имкониятига эга бўладилар. Бу эса мамлакат хоккейи ривожи учун катта қадам бўлиши мумкин.

Терма жамоамиз мусобақада қуйидаги жадвал бўйича ўйинлар ўтказади:

28 февраль – Ўзбекистон – ЖАР (14:30)

1 март – Люксембург – Ўзбекистон (14:30)

3 март – Туркманистон – Ўзбекистон (14:30)

4 март – Ўзбекистон – Босния ва Герцеговина (11:00)

6 март – Таиланд – Ўзбекистон (18:00)

Барча ўйинлар Тошкент вақти билан белгиланган. Ўзбекистон терма жамоаси ўзининг биринчи жаҳон чемпионатида қандай натижалар қайд этишини мухлислар катта қизиқиш билан кутмоқда.