Иллюстратив фото

“Ўзбеккино” Миллий агентлигининг “Республика кинопрокат маркази” ташкил этилганига кўп вақт бўлгани йўқ. Марказ ўзбек киноиндустриясининг энг асосий муаммоларидан бири — кинопрокат тизимини республика миқёсида йўлга қўйиш орқали киномаҳсулотларининг томошабинга етиб боришини таъминлаш билан бир қаторда, миллий фильмларимизни халқаро кинопрокатга олиб чиқиш ишларини ҳам бошлаб юборган.

Халқаро йўналишдаги ишларни жаҳон стандартлари даражасида йўлга қўйиш учун яқинда Марказ қошида Халқаро алоқаларни ривожлантириш сектори ташкил этилди.

Айни кунларда Марказ ходимлари “Ўзбеккино” Миллий агентлиги буюртмасига кўра ишлаб чиқарилган 15 та фильмни жорий йил 18 — 21 март кунлари Гонконгда бўлиб ўтадиган Осиё қитъасининг энг йирик кино ва телевизион маҳсулотлар бозори — “FILMART” (Hong Kong International Film & TV Market)га тақдим этиш учун тайёрлашмоқда.

Ўзбек киноиндустрияси тарихида илк маротаба халқаро кинобозорга олиб чиқилаётган миллий фильмлар, асосан, 2017-2018 йилларда суратга олинган бўлиб, улар бадиий, ҳужжатли ва қисқа метражли жанрлардан иборат.

Бу йил 23-марта ўтказиладиган халқаро “FILMART” кинобозорининг мақсади Осиё — Тинч океани ҳудудида кино маҳсулотлари прокатини ташкил этиш ҳамда мазкур соҳада халқаро кинобизнес шерикчиликни кенгайтиришдан иборат. 2018 йилда ўтказилган ушбу йирик кинотадбирда АҚШ, Буюк Британия, Канада, Жанубий Корея, Япония, Ҳиндистон каби жами 37 та мамлакатдан 850 та иштирокчи, 8700 тадан ортиқ илғор кино ишлаб чиқарувчи — харидор компанияларнинг иштирок этгани ҳам унинг нечоғли нуфузли эканини кўрсатади.

Тадбир иқтисодий ва инвестициявий йўналишда бўлиб ўтадиган HAF (Hong Kong-Asia Film Financing Forum) форуми ҳамда кино ва телеконтент маҳсулотлари бозори сифатида ҳам эътиборга моликдир. Унда Осиё ҳамда Ғарб киносаноатинининг киновидео маҳсулотлари ишлаб чиқарувчилари ва харидорлари ўртасида кўп миллионли шартномалар тузилади ҳамда ҳамкорлик масалалари келишилади.

Ўзбек фильмларининг ушбу нуфузли кинобозорга олиб чиқилиши мамлакатимиз киноиндустриясида тарихий воқеа, дейиш мумкин. Жаҳон интернет тармоғи орқали миллий фильмларимизнинг трейлерлари билан олдиндан танишган чет эллик харидорлар Гонконгда учрашиш масаласида “Республика кинопрокат маркази”га 100 дан ортиқ таклифлар юборишганини эътиборга оладиган бўлсак, олдиндан айтиш мумкинки, фильмларимизнинг Осиё майдонидаги бозори чаққон бўлиши, шубҳасиз.

“Республика кинопрокат маркази” бу йил ҳисобидан халқаро миқёсда ўтказиладиган бошқа нуфузли кинобозорларда ҳам фаол қатнашиш орқали фильмларимизнинг дунё экранларидаги шонли юришлари кўламини янада оширишни мақсад қилган.