Фото: “Халқ сўзи”

Фарғона вилоятининг Қўштепа туманида жойлашган “Ўқчи” МФЙнинг асосий драйвери мева-сабзавот етиштириш бўлиб, аҳоли хонадонларида етиштирилаётган ширин-шакар мевалар, сархил сабзавотлар водий бозорларида анча машҳур.

— 5300 нафардан зиёд аҳоли истиқомат қиладиган маҳалламизда ҳар бир оила ўз томорқасидан яхши даромад олади, — дейди “Ўқчи” МФЙ раиси Обиджон Солиев. — Маҳалламизда йилига тўрт маротабагача ҳосил олиб, етиштирган маҳсулотини хорижга экспорт қилаётган миришкор оилалар кўпчиликни ташкил этади.

Меҳнат фахрийлари Юсуфбек ва Ҳикматхон Рўзматовлар мўъжазгина томорқасида ҳар йили ўртача 2 тонна узум етиштирилади. Узумни маҳаллий тадбиркорлар кўмагида экспорт қилиш орқали ушбу оила йилига 18 – 20 миллион сўм даромад олади.

Шунингдек, хонадондаги 4 сотих ерда аччиқ қалампирнинг 5 хил нави парваришланиб, ҳар сотих ердан 2,5 – 4 миллион сўм даромадга эга бўлишади. Эрта кўкламда буюртма асосида қалампир кўчатлари тайёрлаб бериш оиланинг яна бир қўшимча даромад манбаидир. Консерва қилиниб ички бозорда сотиладиган аччиқ қалампир қишда оила тирикчилиги бекаму кўст бўлишини таъминлайди.

Ботир МАДИЁРОВ, “Халқ сўзи”.