Интернетда тарқалган хабарга кўра, Mobiuz компанияси киберҳужумга учраган. Хакерлар компаниянинг корпоратив тармоғи тўлиқ бузилганини иддао қилмоқда. Унга кўра, тахминан 280 та компьютердан иборат ички тизимга кириш имкони қўлга киритилган.

Киберҳужум уюштирган хакерларнинг иддао қилишича, уларда алоқа операторининг SMS шлюзлари, почта серверлари, домен контроллери, биллинг хизматлари, шунингдек MYID юзни таниш тизими ва ички маълумот омборларига тўлиқ кириш имкони мавжуд.

Бундан ташқари, мижозларнинг рўйхат маълумотлари, шахсий ҳужжатлари (расмлари билан), бизнес мижозлар ҳамда молиявий маълумотлар олиб чиқилгани айтилмоқда. Маълумотлар орасида Oracle ва PostgreSQL/MySQL платформаларидаги 8 та йирик база борлиги қайд этилган.

Шунингдек, компаниянинг тахминан 3 минг нафар ходимнинг шахсий маълумотлари ҳам қўлга киритилган бўлиши мумкин.

Mobiuz компанияси расмий сайтида кеча, 16 февраль куни ҳақиқатдан ҳам тармоқ инфратузилмасига рухсатсиз киришга бўлган уринишлар аниқлангани ҳақида маълумот берилган. Унда қайд этилишича, жорий йилнинг февраль ойида хавфсизлик тизимлари мониторинги давомида компаниянинг асосий тизимларга уланмаган синов серверларидан бирига рухсатсиз кириш аниқланган. Бироқ сервер қўшимча изоляция қилинган бўлиб, бу ҳодисани чегаралаш имконини берган.

«Киберхавфсизлик бўйича мутахассисларнинг махсус бўлинмаси замонавий дастурий таъминотдан фойдаланган ҳолда IT инфратузилмасини кеча-ю кундуз кузатиб боради ва кибертаҳдидлардан ҳимоя қилмоқда», дейилади алоқа оператори хабарида.

Таъкидланишича, абонентлар ҳақидаги маълумотлар, уларнинг шахсий ва молиявий маълумотлари сақланадиган тизимлар тўлиқ ҳимояланган ҳудудда жойлашган бўлиб, у ерга ҳеч қандай кириш излари топилмаган. Хизматлар фаолияти бузилмаган ва мижозларнинг шахсий маълумотлари сизиб чиқмаган.

«Ҳозирги вақтда компания масъул органлар билан ҳамкорликда ҳодисани батафсил текширишни давом эттирмоқда ва ахборот тизимлари ҳимоясини кучайтириш бўйича қўшимча чора-тадбирлар мажмуасини амалга оширмоқда», дея қўшимча қилинган Mobiuz хабарида.

Билдирилишича, 2025 йилнинг ўзида компания мутахассислари томонидан 10 мингдан ортиқ турли даражадаги DDoS-ҳужумлар, шу жумладан 180 дан ортиқ жиддий ҳужумлар муваффақиятли қайтарилган. 68 мингдан ортиқ фишинг ҳаволалари ва фирибгарлик сайтлари блокланган ҳамда тармоқ инфратузилмасига рухсатсиз киришга бўлган 3 та уринишнинг олди тўлиқ олинган.