Кинематография агентлиги буюртмасига биноан суратга олинган «Мерос» фильми жорий ой Сингапурда ўтказилган "Singapore International Film Festival-2022" ва Ҳиндистонда ўтказилган “Олтин тулпор” ("Golden Horse Film Festival") халқаро кинофестивалларида "Энг яхши хорижий фильм" номинацияси бўйича ғолиб бўлди.

Бадиий фильм ўзбек ва қозоқ халқларининг абадий дўстлиги, анъаналари ҳақида ҳикоя қилади. Сценарий муаллифи ва режиссёр Ҳилол Насимов, постановкачи оператор Ҳусан Алиев, композитор Дмитрий Янов-Яновский, постановкачи рассом Фазлиддин Турдиев.

Мазкур фильм Перу ва Ҳиндистон давлатларида ўтказилган халқаро кинофестивалда қатнашиб, «Йилнинг энг яхши хорижий фильми» номинациясида ғолибликни қўлга киритган. Шунингдек, май ойида Россияда бўлиб ўтган “Золотой Витязь” кинофорумида “Қозоқ ва ўзбек халқлари ўртасидаги анъана ва муносабатларнинг умумийлиги мавзусини очиб бергани учун” махсус диплом билан тақдирланган.

Маълумот учун, яқин кунларда "Мерос" фильми Россиянинг Қозон шаҳрида бўлиб ўтадиган Халқаро кинофестивалнинг танловдан ташқари дастурида намойиш этилиши режалаштирилган.