Ботир МАДИЁРОВ/«Халқ сўзи». Ипакчилар шаҳри – Марғилонда аҳоли эски ҳовлиларда истиқомат қилади. Айниқса, шаҳар марказида аҳоли хонадонлари жуда тор, бу нафақат хотиржам яшаш, балки тадбиркорлик, ҳунармандчилик фаолиятида ҳам анча ноқулайликлар туғдириши турган гап.

Шу йилнинг 11-12 июль кунлари Фарғона вилоятига ташрифи чоғида давлатимиз раҳбари Марғилонда бир гуруҳ нуронийлар билан суҳбатлашди. Самимий мулоқотда марғилонлик фахрийлар Президентдан шу масалада кўмак сўраганди.

Эзгу ташаббус доирасида Марғилон шаҳрининг «Ипакчи» ва «Қиргули» МФЙ ҳудудидаги бир қаватли эски уйлар ўрнида Реновация дастури асосида барча замонавий шароитларга эга кўп қаватли уйлар қурилишига киришилди.

—Кўп қаватли уйлар ота-боболардан мерос 70-80 йиллик ҳовлилар ўрнида бунёд этилаётгани бизга манзур бўлмоқда,—дейди меҳнат фахрийси Аҳмаджон Бўриев.—Айни пайтда 425 хонадондан иборат 11 та 7 қаватли уйлар қад кўтармоқда. Ўтган қисқа вақтда чордевор уйларимиз ўрнида кўркам шаҳарча қурилиши жадал олиб борилмоқда.

Уйлар сифатли, арзон бўлиши учун қурилиш-пудрат ташкилотлари асосан маҳаллий хом ашё, энергия тежамкор маҳсулотлардан фойдаланаётгани эътиборга лойиқ.

Ўз навбатида, вилоят марказига элтувчи катта автомагистрал бўйида жойлашган Янги ҳаёт кўчасида 75 гектар ерда «Янги Ўзбекистон» массиви қуриляпти. Биринчи босқичда бу ерда 11 та 12,16 қаватли уйлар барпо этилиши режалаштирилган.

Янги массивда кўп қаватли уйлар билан бирга лойиҳа қиймати 50 млн. долларлик савдо комплекси, бизнес маркази, 2 та мактаб, 6 та мактабгача таълим ташкилоти ҳамда 2 та тиббий клиника қуриб битказилади. Маданий ва кўнгилочар масканлар, ландшафт архитектураси асосида яшил хиёбонлар ташкил этилади.