Фарҳод Эсонов/«Халқ сўзи». Ангор тумани маданият уйида жойлашган 137-сайлов участкасида ҳам сиёсий партиялардан қўйилган номзодларга овоз бериш жараёни давом этмоқда. Барчаси шаффоф ва адолатли, янгича тизимда ўтказилмоқда. Қувонарлиси, фуқароларнинг сайловларга иштиёқ ва катта умидлар билан ошиқаётгани бўлмоқда.

Ангор туманидаги «Саидносирхон» фермер Хўжалиги раҳбари, Ўзбекистон Қаҳрамони Исохон Баҳромов ҳам сайловда овоз берди.

— Сайлов «Менинг танловим — обод Ватаним» шиори остида ўтказилаётганида чуқур маъно бор. Бу мамлакатимизда катта ўзгаришлар бўлаётганидан дарак беради. Мен ҳам Янги Ўзбекистон тараққиёти, халқимиз тўкинлиги, фермерлик ҳаракатининг янада ривожланиши учун ўзим муносиб деб билган номзодларга овоз бердим. Номзодларнинг сайловолди дастурларида келтирилган таклифлар мамлакатимиз тараққиёти, халқимиз фаровонлиги учун хизмат қилишига ишонаман.