Farhod Esonov/“Xalq soʻzi”. Angor tumani madaniyat uyida joylashgan 137-saylov uchastkasida ham siyosiy partiyalardan qoʻyilgan nomzodlarga ovoz berish jarayoni davom etmoqda. Barchasi shaffof va adolatli, yangicha tizimda oʻtkazilmoqda. Quvonarlisi, fuqarolarning saylovlarga ishtiyoq va katta umidlar bilan oshiqayotgani boʻlmoqda.

Angor tumanidagi “Saidnosirxon” fermer Xoʻjaligi rahbari, Oʻzbekiston Qahramoni Isoxon Bahromov ham saylovda ovoz berdi.

— Saylov “Mening tanlovim — obod Vatanim” shiori ostida oʻtkazilayotganida chuqur maʼno bor. Bu mamlakatimizda katta oʻzgarishlar boʻlayotganidan darak beradi. Men ham Yangi Oʻzbekiston taraqqiyoti, xalqimiz toʻkinligi, fermerlik harakatining yanada rivojlanishi uchun oʻzim munosib deb bilgan nomzodlarga ovoz berdim. Nomzodlarning saylovoldi dasturlarida keltirilgan takliflar mamlakatimiz taraqqiyoti, xalqimiz farovonligi uchun xizmat qilishiga ishonaman.