Кеча, 23 январ куни Италия А сериясининг 22-тур ўйинлари бошланди. Турни очиб берган ўйинда «Интер» клуби ўз майдонида «Пиза»ни қабул қилди.

Учрашув кутилмаган старт билан бошланди. Дастлаб, 11-дақиқада Ян Зоммернинг хатосидан сўнг, Стефано Морео ҳисобни очди. 23-дақиқада бурчак тўпидан сўнг, Мореонинг ўзи ҳисобни 0:2 кўринишига келтирди.

Ўйин бой берилаётганини кўрган «Интер» мураббийи Кристиан Киву 34-дақиқанинг ўзидаёқ Луис Энрикенни Федерико Димаркога алмаштирди.

39-дақиқада «Пиза» дарвозасига пенальти белгиланди. 11 метрлик жарима тўпини Пётр Зелинский аниқ амалга ошириб, ҳисобни қисқартирди.

41-дақиқада эса захирадан ўйинга қўшилган Димарконинг моҳирона узатмасидан кейин Лаутаро Мартинес ҳисобни тенглаштирди.

Биринчи бўлимга ҳакам томонидан қўшиб берилган дақиқаларнинг иккинчиси ўтиб бораётганида Франческо Эспозито ҳисобни 3:2 кўринишига келтирди.

Биринчи бўлимдаги муваффақиятидан илҳомланган «Интер» жамоаси иккинчи бўлимда ҳам 3 та гол уришни уддалади. Голларга Федерико Димарко, Гейнрих Мхитарян, Йоан Бонни муаллифлик қилди.

Шу тариқа, «Интер» бу мавсум биринчи маротаба битта ўйинда 6 та гол киритишни уддалади.