Бишкек шаҳрида бўлиб ўтаётган «Марказий Осиё мамлакатлари парламентлари: минтақани ҳар томонлама ривожлантириш бўйича самарали ечимлар» мавзусидаги III парламентлараро форумда ёшлар бандлигини таъминлаш ҳамда сунъий интеллект соҳасида ҳуқуқий базани такомиллаштириш масалалари атрофлича муҳокама қилинди.

Форумда ёшлар бандлигини таъминлаш, меҳнат бозорида тенг имкониятларни яратиш, таълим ва касбга йўналтириш тизимини янада такомиллаштириш масалаларига алоҳида эътибор қаратилди.

Шунингдек, рақамли суверенитет, киберхавфсизлик, шахсий маълумотларни ҳимоя қилиш, Интернетдаги таҳдидлардан ёшларни асраш борасида қўшма ҳаракатларни кучайтиришга доир таклифлар билдирилди.

Муҳокама давомида сунъий интеллект технологияларининг давлат бошқаруви, иқтисодиёт, таълим ва соғлиқни сақлаш соҳаларидаги ўрни ва имкониятлари ҳақида ҳам фикр алмашилди.

Таъкидланганидек, сунъий интеллект билан боғлиқ ҳуқуқий базани шакллантириш, инсон ҳуқуқлари ва ахлоқий меъёрлар билан уйғунлашган қонунларни қабул қилиш бугунги куннинг долзарб вазифаларидан саналади. Қатор давлатлар бу борада амалий қадамларни бошлаган бўлиб, минтақавий ҳамкорлик орқали мазкур соҳадаги тажриба алмашуви муҳим аҳамиятга эга.

Форум якуни бўйича Марказий Осиё давлатларининг парламентлараро ҳамкорлиги ва ташаббусларининг йўналишлари белгилаб берилган Бишкек декларацияси қабул қилинди.