Архив фото

Душанба куни эрталаб “Ҳизбуллоҳ” ракеталари Исроилнинг учинчи йирик шаҳри Ҳайфага зарба берди. Бу Ғазо урушининг бир йиллиги куни ва Исроил Ливан жанубига қуруқликдан бостириб киришини кенгайтиришга тайёрланаётган паллага тўғри келди.

Бундан олдин Ғазода Исроилга қарши курашаётган ҲАМАСнинг иттифоқчиси, Эрон томонидан қўллаб-қувватланган “Ҳизбуллоҳ” “Фади 1” ракеталари билан Ҳайфа жанубидаги ҳарбий базани нишонга олганини ва 65 км узоқликдаги Тиберияга яна ҳужум уюштирганини маълум қилган эди.

Исроил полицияси йирик порт ҳисобланган Ҳайфага ракеталар тушганини тасдиқлади. Маҳаллий матбуот 10 киши яраланганини ҳақида хабарлар тарқатилди.

Исроил ҳарбийлари Ливандан Ҳайфага бешта ракета учирилганини билдирган баёнотда зарбаларни тутиб қолувчи қурилмалар ўққа тутилгани, ҳудудларда снарядлар аниқланганини маълум қилди. Унда айтилишича, Исроилнинг шимолидаги Жалила минтақасидаги Тиберияга яна 15 та ракета отилган, улардан баъзилари тутиб олинган. Полицияга кўра, баъзи бинолар ва мулклар вайрон бўлган.

Исроил душанба куни тонгда Ришон-Лезион ва Палмахимнинг марказий ҳудудларида сиреналар чалинганидан кейин шарқдан учирилган иккита ҳаво нишонини тутиб олган.

Исроил “Ҳизбуллоҳ”ни Байрут марказидаги турар-жой бинолари остига ўз қўмондонлик марказлари ва қурол-яроғларини қасддан жойлаштирганликда айблаб келади. Гуруҳ эса тинч аҳоли орасида қурол сақлаётганини инкор этади.

“Ҳизбуллоҳ” 2023 йил 8 октябрда ҲАМАС билан бирдамлик сифатида Исроилга ракета отишни бошлаган эди. “Ҳизбуллоҳ” ва Исроил ўртасидаги бир йиллик отишмалардан сўнг Ливанда можаро сезиларли даражада кучайди.

Душанба куни исроилликлар ҲАМАС ҳалокатли ҳужумининг бир йиллигини нишонладилар. Исроил маълумотларига кўра, ўтган йилнинг 7 октябр куни ҲАМАС етакчилигидаги аскарлар 1200 нафарга яқин одамни ўлдирган ва 250 нафарга яқин инсонни асирга олган. Бугун, 7 октябрь куни Исроил бўйлаб хавфсизлик кучлари юқори шай ҳолатга келтирилди, ҳарбий ва полиция йиллик муносабати билан Фаластиннинг эҳтимолий ҳужумларини кутаётганини айтди.

“ҲАМАСнинг ҳужуми Исроилнинг Ғазога ҳужумини бошлаб берди, бу эса аҳоли зич жойлашган қирғоқ анклавини вайрон қилди ва деярли 42 минг кишининг ҳаётига зомин бўлди”, — дейди Фаластин соғлиқни сақлаш идоралари маълумотида.

Ғазо уруши минтақавий можарога айланиб, Эроннинг “Қаршилик ўқи”, “Ҳизбуллоҳ”, Яман ҳусийлари, Ироқ милиция гуруҳларини жалб қилди ва Исроил ҳамда Эрон ўртасида бир нечта тўғридан-тўғри қарама-қаршиликларни келтириб чиқарди. Ҳаво ҳужумларидан Ҳасан Насруллоҳнинг меросхўри сифатида кўрилган Ҳошим Сафий ад-Дин ҳам йўқ қилингани айтилмоқда. Пайшанба кунидан бери ундан хабар йўқ. Расмийларга кўра, Исроилнинг зарбалари қутқарувчиларнинг қидирув миссиясини бажаришига тўсқинлик қилмоқда.

Исроилнинг Ливанга ҳужумлари 2 мингдан ортиқ одамнинг ҳаётига зомин бўлди. Ҳужумларнинг аксарияти сўнгги икки ҳафта ичида амалга оширилди. Шунингдек, Ливан жануби, Бекаа водийси ва Байрутнинг жанубий чеккасидан бир миллиондан ортиқ одамнинг оммавий қочиб кетишига сабаб бўлди.