Бош прокуратура ҳузуридаги Департаментнинг Юқори Чирчиқ тумани, Олмалиқ шаҳри бўлимлари ва ИИББ ходимлари ҳамкорлигида тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Тадбир давомида, фуқаролар Ю.И. ва А.Ш. яшаш хонадонларида тижорат мақсадида умумий фойдаланишдаги газ тармоғига ўзбошимчалик билан тўғридан-тўғри уланиб олганлиги фош этилди.

Ушбу қонунбузарлик натижасида жами 404,6 миллион сўмлик табиий газдан ноқонуний фойдаланганликлари аниқланган.

Шу каби ҳолат Департаментнинг Юнусобод тумани бўлими томонидан ўтказилган терговга қадар текширувда ҳам кузатилди.

Унга кўра, фуқаро Х.П. ва бошқалар ўзаро тил бириктириб «Буюк Турон» МФЙ ҳудудидаги нотурар бинода тижорат мақсадида умумий фойдаланишдаги газ тармоғига ўзбошимчалик билан тўғридан-тўғри уланиб, 206,6 миллион сўмлик табиий газдан ноқонуний фойдаланган.

Бундан ташқари, Департаментнинг Булунғур тумани бўлими томонидан ўтказилган терговга қадар текширувда фуқаро К.Х. «Мехржон» МФЙ ҳудудидаги новвойхонада тижорат мақсадида умумий фойдаланишдаги газ тармоғига ўзбошимчалик билан тўғридан-тўғри уланиб, 190,5 миллион сўмлик табиий газдан ноқонуний фойдаланиб келганлиги ойдинлашган.

Мазкур ҳолатлар юзасидан Жиноят кодексининг 169-моддаси билан жиноят ишлари қўзғатилиб, тергов ҳаракатлари олиб борилмоқда.