Саид ДОНИШЕВ/«Халқ сўзи». Ҳаво ҳароратининг кескин пасайиши туфайли истеъмолчиларнинг табиий газга бўлган талаби кескин ошиб, бунинг натижасида айрим ҳудудлардаги қувурларда газ босимининг камайиши кузатилмоқда.

Биринчи навбатда аҳоли хонадонлари ва ижтимоий соҳа объектларини табиий газ билан таъминлаш устувор вазифа ҳисобланади. Шу боис “Жиззахшаҳаргаз” газ таъминоти бўлими ходимлари томонидан шаҳардаги 1100 тадан зиёд хонадон мавжуд бўлган Маданият ва Кимёгар маҳалла фуқаролар йиғини ҳудудида 230 метр, Сайилжойи маҳалласидаги кўп қаватли уйларда табиий газ босимини яхшилаш мақсадида 268 метр янги газ тармоғи тортилди.

— Буларнинг барчаси юртдошларимизнинг турмушини янада фаровонлаштиришга қаратилган бўлиб, ходимларимиз жойларда қиш мавсумини беталафот ўтказиш бўйича тушунтириш ишлари ҳам олиб боришмоқда, — дейди “Жиззахшаҳаргаз” газ таъминоти бўлими бош муҳандиси Дилшод Қурбонов.

Жиззах шаҳридаги Наврўз, Бунёдкор, Сангзор, Боғишамол маҳалларида газ тақсимлаш пунктларини техник кўрикдан ўтказиш, айрим эскирган ускуналарни янгисига алмаштириш ишлари давом этмоқда.