Said DONISHEV/“Xalq soʻzi”. Havo haroratining keskin pasayishi tufayli isteʼmolchilarning tabiiy gazga boʻlgan talabi keskin oshib, buning natijasida ayrim hududlardagi quvurlarda gaz bosimining kamayishi kuzatilmoqda.

Birinchi navbatda aholi xonadonlari va ijtimoiy soha obyektlarini tabiiy gaz bilan taʼminlash ustuvor vazifa hisoblanadi. Shu bois “Jizzaxshahargaz” gaz taʼminoti boʻlimi xodimlari tomonidan shahardagi 1100 tadan ziyod xonadon mavjud boʻlgan Madaniyat va Kimyogar mahalla fuqarolar yigʻini hududida 230 metr, Sayiljoyi mahallasidagi koʻp qavatli uylarda tabiiy gaz bosimini yaxshilash maqsadida 268 metr yangi gaz tarmogʻi tortildi.

— Bularning barchasi yurtdoshlarimizning turmushini yanada farovonlashtirishga qaratilgan boʻlib, xodimlarimiz joylarda qish mavsumini betalafot oʻtkazish boʻyicha tushuntirish ishlari ham olib borishmoqda, — deydi “Jizzaxshahargaz” gaz taʼminoti boʻlimi bosh muhandisi Dilshod Qurbonov.

Jizzax shahridagi Navroʻz, Bunyodkor, Sangzor, Bogʻishamol mahallarida gaz taqsimlash punktlarini texnik koʻrikdan oʻtkazish, ayrim eskirgan uskunalarni yangisiga almashtirish ishlari davom etmoqda.