Франция президенти Эммануель Макрон бўлажак сайловларда ўта чап ёки ўта ўнгнинг ғалабаси «биродаркушлик уруши» (фуқаролар уруши)га олиб келиши мумкинлигидан огоҳлантирди. Бу ҳақда «Politico» нашри хабар бермоқда.

Президент ўта чап қанот «La France Insoumise» ва ўта ўнг «Rassemblement national» партияларини бўлиниш ҳамда кескинликни келтириб чиқаргани учун танқид қилиб, бу партияларнинг дин, шунингдек миллатга оид сиёсати жамоаларни можаро томон ундашини тахмин қилган.

Макрон ўз интервьюсида ўта ўнгчилар ишончсизлик ва ўзига хосликка эътибор қаратаётгани одамларни ўз динига ёки келиб чиқиши билан боғлиқ конфликтларни кучайтирган. Жан-Люк Меланшон бошчилигидаги ўта чап партияни эса сайловчиларни жалб қилиш учун миллий бўлинишни тарғиб қилишда, хусусан, Исроилнинг Ғазодаги ҳаракатларини танқид қилишда айблаган.

Макроннинг ушбу баёноти ўз коалициясининг Европа Иттифоқи сайловларида ёмон натижа кўрсатганидан кейин янграши кўплаб танқидчиларнинг эътиборига тушган.

Маълумот учун айтиш керакки, Миллий ралли биринчи турда 35%, чап қанот иттифоқи 27% ва Макроннинг марказчилари 19% фоиз овоз тўплашга эришган. Унинг таъкидлашича, экстремал ечимлар жозибадор кўриниши мумкин, аммо охир-оқибат кўпроқ бўлиниш ва можароларга сабаб бўлади.

Европа Иттифоқи парламентга сайловларда иқтисодиёт, миграция ва халқаро можаролар ҳақидаги хавотирлар сайловчиларнинг онгида ҳукмронлик қилган ва овоз бериш қарорига энг кўп таъсир қилгани ҳақида хабар берган эдик.