Фото: Халқ сўзи

«Халқ сўзи» ва «Народное слово» газеталари таҳририятида академик Наим Каримов билан учрашув бўлиб ўтди.

12 декабрь куни таниқли адабиётшунос олим табаррук 90 ёшга тўлади. Тадбирда сўз олганлар Наим Каримовни қутлуғ ёшлик юбилейи билан табрикларкан, унинг давлат ва жамоат ишларидаги фаолиятига, салмоқли илмий-ижодий меросига, жумладан, миллий адабиётни ривожлантириш, жадидчилик ҳаракатининг етакчилари бўлган шоир ва ёзувларнинг номи ҳамда асарларини халқимизга таништириш, хотирасини абадийлаштириш борасидаги хизматларига алоҳида эътибор қаратди.

Олим кейинги беш-олти йилда ҳам баракали ижод қилмоқда. Яқинда маърифатпарвар шоир Усмон Носир ҳаёти ва ижодига бағишланган асари китоб ҳолида нашр этилди. Матбуотда, хусусан, «Халқ сўзи», «Народное слово» газеталарида мамлакатимизда турли соҳаларда юз бераётган ҳаётбахш ўзгаришлар, жумладан, адабиёт, маънавият, илм-фан ривожи, сўз ва ижод эркинлигини таъминлаш, ижодкорларни ҳар томонлама қўллаб-қувватлаш борасида амалга оширилаётган чора-тадбирлар мазмун-моҳияти ҳамда бошқа долзарб мавзулардаги мақолалари билан мунтазам қатнашиб келмоқда.

— «Халқ сўзи» ва «Народное слово» газеталарини ташкил этилганидан буён кузатиб келаман. Мустақил Ватанимиз матбуотининг дарғаларидан ҳисобланган ушбу нашрлар бугун ҳам ҳаётимизни турли ракурслардан ёритиб келмоқда. Саҳифаларида ўнлаб мақолаларим дунё юзини кўриб, юртдошларимиз хонадонларига кириб борган, халқимиз қалбидан жой олган. Шу боис таҳририятда, бу ерда ишлаётган ижодкорлар даврасида ўзимни бегона ҳис қилмайман. Бугунги эътибордан ҳам жуда хурсандман, — деди Наим Каримов.

Тадбирда олим ўзининг ижодий фаолияти билан боғлиқ хотираларини йиғилганларга сўзлаб берди.