Яқинда Халқаро туркий маданият ташкилоти – ТУРКСОЙ томонидан “Ақтау – 2025 йилда туркий дунёнинг маданият пойтахти” сифатида эълон қилинди.

Шу муносабат билан ўтказилиши режалаштирилган тадбирлар доирасида Қозоғистоннинг Ақтау шаҳрида “Nomad Puppet” I Халқаро қўғирчоқ театрлари фестивали бўлиб ўтди. Унда Ўзбекистон, Озарбайжон, Қирғизистон, Татаристон, Туркия ва Қозоғистон ижодий жамоалари иштирок этди.

Фестивалда мамлакатимиз номидан қатнашган Фарғона вилояти қўғирчоқ театри ижодий жамоаси ТУРКСОЙнинг махсус дипломи билан тақдирланди.

— Нуфузли ҳакамлар ҳайъати хулосасига кўра, ижодий жамоамизга “Энг яхши актёрлик ансамбли” номинацияси ғолиблиги соврини топширилди, — дейди театр директори Таваккал Султонов. —Таъкидлаш жоизки, асосан ёш истеъдодлардан шаклланган театримиз 2022 йилдан буён халқаро ижодий фестивалларда муваффақиятли қатнашиб келмоқда. Репертуаримиздаги миллий ҳамда жаҳон классик томошалари, сўзсиз ижро этиладиган ва миллий либослар ёрдамида талқин этиладиган мусиқали саҳна асарлари томошабинларга жуда манзур бўлаётир.

Яқин кунларда Қозоғистонда ўтказиладиган яна бир фестивалга таклифнома олганмиз. Бу ерда “Тойчоқ” номли саҳна асари намойиш этилади. Шунингдек, жорий йилнинг октябрь ойида Туркияда яна бир нуфузли анжуманда қатнашиш ҳамда мухлислар эътиборига “Мусиқали чойхона” асарини тақдим этиш бўйича тайёргарлик ишлари олиб бориляпти. Театр жамоамизни маънан ва моддий жиҳатдан қўллаб-қувватлашда Маданият вазирлиги ҳамда Фарғона вилояти ҳокимлигининг кўмаги беқиёс.

Айтиш жоиз, қардош Қозоғистонда ташкил этилган ўзига хос маданият ва санъат байрами доирасида Фарғона вилояти қўғирчоқ театри ҳамда барча иштирокчи театрлар ўртасида келгусидаги фаол ҳамкорлик юзасидан меморандумлар имзоланди.

Ботир МАДИЁРОВ

«Халқ сўзи».