Ерда кучли, планетар миқёсдаги магнит бўронлари бошланди. Бу ҳақда Россия Фанлар Академияси Қуёш астрономияси лабораторияси маълум қилди.

Қайд этилишича, ҳозирги геомагнит индекси Kp G2–G3 оралиғида бўлиб, бу ўрта ва кучли магнит бўронларига тўғри келади. Олимларнинг фикрига кўра, бу ҳодиса Қуёшда икки-уч кун олдин юз берган кучли портлашлар натижасида Ерга йўналган плазма тўлқинлари билан боғлиқ.

Дастлаб портлашлар Ерга таъсир қилмайди деб ҳисобланган, аммо амалда плазма тўлқинлари сайёрага қараб ёйилган ва тарқалиш бурчаклари олдинги ҳисоб-китобларга нисбатан каттароқ, тезлиги эса анча юқори.

Тахмин қилинишича, магнит бўронлари тахминан бир кун давом этади, бироқ эртага тўхтамайди, балки асосий фазага ўтади. Бу фазада Ерга плазманинг асосий массаси етиб келади ва янада кучли геомагнит жараёнлари бошланади.

Маълумот учун, магнит бўронлари беш баллик тизим бўйича баҳоланади. G1 даражаси энг заиф бўлиб, у электр ускуна ва техникага деярли таъсир қилмайди. G3 даражаси эса кучли бўлиб, у энергия тизимларига таъсир қилади ва сунъий йўлдош навигациясида узилишлар юз беришига олиб келиши мумкин. Энг юқори даража — G5, бу ҳолда электр тармоқларида жиддий муаммолар ва сунъий йўлдошлар ишлашида катта носозликлар рўй бериши мумкин.