Олий Мажлис Қонунчилик палатаси депутати Бахтиёр Маниёзов Марҳамат туманидаги “Қовунчи” маҳалласида бўлиб, камбағалликни қисқартириш ва аҳоли турмуш фаровонлигини ошириш борасидаги ишлар билан танишди. Томорқадан самарали фойдаланиш, оилавий тадбиркорликни ривожлантириш ҳамда ёшларни касбга йўналтириш масалаларига ҳам алоҳида эътибор қаратди.

Депутат маҳалла аҳолиси билан очиқ мулоқот ўтказиб, уларнинг муаммоларини эшитди ва амалий ёрдам беришга киришди.

— Маҳалламизда асосий даромад томорқачиликдан бўлгани боис бир қарич ерни ҳам бўш қўймайман, — дейди Шоҳиста Жалолдинова. — Депутат Бахтиёр Маниёзов хонадонимга келиб, бу борада янги тавсиялар берди. Мутахассислигим бўйича ҳам ишлаш имконим бор. Шуни инобатга олган ҳолда менга бўш иш ўринлари таклиф этилди.

Мулоқот давомида фуқароларнинг кўплаб муаммолари жойида ҳал қилинди. Айримларга ишга жойлашиш, бошқаларга эса кредит ва субсидия олиш масалалари бўйича амалий кўмак кўрсатилди. Шу тариқа депутатнинг юзма-юз мулоқоти натижасида ўнлаб оилаларнинг орзу-умиди амалга ошиши йўлида янги имкониятлар яратилди.

Саминжон ҲУСАНОВ

«Халқ сўзи».