Кеча, 17 январь куни Англия Премьер лигасининг 22-тур ўйинлари бўлиб ўтди. Кун доирасидан ўрин олган ўйинларга тўхталиб ўтамиз.

Англия Премьер лигасида 5 та турдан бери ғалаба нима эканлигини билмай келган «Челси» жамоаси бу турда «Брентфорд» клубини қабул қилди. Ушбу ўйин олдидан «аристократлар» рақибидан 2 очко жамғарган ҳолда 7-ўринни эгаллаб туришганди. Мазкур ўйиндаги мағлубият «Брентфорд»ни 7-ўринга тушириб юборди.

Ўйинда ҳисоб 26-дақиқада Жоао Педро томонидан очилди. 76-дақиқада Кол Палмер пеналтидан гол киритиб, якуний ҳисобни ўрнатди. Ушбу ўйинда Лавия, Колвил, Вилей, Гиттенс, Густо, Мудрик каби футболчиларнинг йўқлиги «Челси»га ғалаба қозониш учун халақит бермади.

Тур доирасида аутсайдерлар қаторига қўшилиб қолаётган «Лидс Юнайтед» клуби ўз майдонида бу йил мазмунли ўйин кўрсатаётган «Фулҳэм» жамоасини қабул қилди.

Ушбу баҳс мезбонларнинг 1:0 ҳисобида ғалаба қозониши билан якунланди. Ўйинда киритилган ягона голга 90+1 дақиқада захирадан ўйинга қўшилган Лукас Нмеча муаллифлик қилди.

Ушбу мағлубиятдан сўнг Лондоннинг «Фулҳэм» клуби турнир жадвалида 9-ўриндан 10-ўринга тушиб қолди.

Сўнгги ўйинларда янада барқарорлик бўйича муаммоларга дуч келаётган «Ливерпуль» клуби бу тур ўз майдонида мусобақа жадвалининг 19-поғонасида бораётган «Бёрнли» клубини қабул қилди.

Ўйин кутилмаганда 1:1 ҳисобидаги дуранг натижа билан якунланди. Голларга «Ливерпуль»дан Флориан Вирц, «Бёрнли»дан Маркус Эдуардс муаллифлик қилди.

Ушбу натижадан сўнг, чемпионат якунланишига 16 тур қолган бир пайтда «Ливерпуль»нинг АПЛ етакчиси «Арсенал» билан ўртасидаги фарқ 14 очкога етди.

Ушбу турдан ўрин олган яна бир қизиқарли баҳсда «Сандерленд» клуби ўз майдонида «Кристал Пэлас»ни мағлуб этган ҳолда турнир жадвалида «Фулҳэм» ва «Ньюкасл»ни қувиб ўтиб, 8-ўринга жойлашиб олди.

Ўйинда 2:1 ҳисоби қайд этилди. Ғолиблар голларга Энцо Ле Фе ва Брайан Бробби муаллифлик қилди. Меҳмонларнинг ягона жавоб голи эса Йереми Пино ҳисобига ёзилди.

Тур доирасидан ўрин олган яна бир сенсацион ўйин «Тоттенҳэм Хотспур» стадионида бўлиб ўтди. Унда майдон эгалари турнир жадвалида 18-ўринни эгаллаб турган «Вест Ҳэм» жамоасини қабул қилди.

Ўйинда ҳисоб 15-дақиқада меҳмонлар футболчиси Саммервилл томонидан очилди. Иккинчи бўлимнинг 64-дақиқасида Кристиан Ромеро «Тоттенҳэм»нинг жавоб голини киритди. Ҳакам томонидан иккинчи бўлимга қўшиб берилган дақиқаларда Каллум Уилсон «Вест Ҳэм»га ғалаба келтирган голни киритди.

Турнинг асосий сенсацияси эса «Арсенал»нинг очко йўқотгани бўлди. Микел Артета бошчилигидаги жамоа тур доирасида сафарда турнир жадвалининг «қизил чизиғи билан қўшни бўлиб турган» «Ноттингем Форест» клубини қабул қилди.

«Ноттингем Форест» клуби ушбу ўйинга юқори кайфиятда етиб келди. Боиси жамоа ўтган турда «Вест Ҳэм»ни мағлуб этиб, «қизил чизиқ»дан анча юқорига кўтарилиб олганди. Бу кайфият мазкур ўйинда ҳам ушбу жамоага ҳамроҳ бўлди, чоғи, Шон Дайч шогирдлари бутун ўйин давомида ўз дарвозалари дахлсизлигини сақлаб қола олди.