Иллюстратив фото

Буюк Британиянинг энг йирик “BAE Systems” мудофаа компаниясининг Барроу-ин-Фурнесс шаҳрида жойлашган заводида жойида ёнғин содир бўлди. Бу ҳақда маҳаллий полиция маълум қилди.

“Фавқулодда хизматлар Барроу-ин-Фурнессдаги “BAE Systems” заводидаги ёнғинга етиб келди. Ядровий таҳдид йўқ”, — дейилади баёнотда.

Маҳаллий оммавий ахборот воситаларининг ёзишича, ушбу иншоотда Буюк Британиянинг атом сув ости кемалари ишлаб чиқарилган.

Фавқулодда вазиятлар хизмати воқеага яқин атрофда яшовчи одамларга уйда қолишни ҳамда эшик ва деразаларни ёпиқ сақлашни тавсия қилган. Полиция маълумотларига кўра, икки киши шифохонага олиб кетилган.

Аввалроқ, Германиянинг энг йирик пўлат ишлаб чиқарувчи “ThyssenKrupp” компаниясининг Саарланд федерал ери Фельклинген шаҳри яқинидаги омборида ёнғин чиққани ҳақида хабарлар тарқалган. Қайд этилишича, объект 30 соатдан ортиқ ёнган. Ёнғинни ўчиришга 200 нафардан ортиқ фавқулодда хизматлар ходимлари жалб қилинган. Ёнғин тутунлари 15 километр узоқликкача етиб борган.

Шу йилнинг июль ойида Германиянинг энг йирик “BASF” кимё компанияси заводида портлаш содир бўлганди. Фавқулодда ҳодиса оқибатида 14 киши тан жароҳати олганди.