Буюк Британия ва Франция Украина ҳудуди бўйлаб Украина Қуролли Кучлари учун ҳарбий базалар ва техника ҳамда қурол-яроғ омборларини ташкил этади. Бу чоралар ўт очиш тўхтатилгандан кейин жорий этилади. Бу ҳақда Буюк Британия бош вазири Кир Стармер маълум қилди.

Стармернинг айтишича, «ихтиёрий коалиция»га кирувчи давлатлар Украина эҳтиёжлари учун қурол-яроғни узоқ муддатли тарзда тақдим этиш бўйича келишувга эришган.

«Биз АҚШ етакчилигида ўт очишни тўхтатиш режимига риоя этилишини мониторинг қилишда иштирок этамиз», — деди Британия бош вазири Парижда «ихтиёрий коалиция» давлатлари, Украина ва АҚШ делегациялари ўртасида бўлиб ўтган учрашув якунлари бўйича.

Шунингдек, Стармер «ихтиёрлий коалиция» давлатлари Россия томонидан эҳтимолий ҳужум содир бўлган тақдирда Украинани қўллаб-қувватлаш чоралари устида ишлашни давом эттиришини қўшимча қилди.

Эслатиб ўтамиз, 6 январь куни Кир Стармер, Франция президенти Эммануэль Макрон ҳамда Украина президенти Владимир Зеленский Украина ҳудудида қўшинларни жойлаштириш бўйича декларацияни имзолаган эди. Ушбу ҳужжат Украина хавфсизлигини ҳавода, денгизда ва қуруқликда таъминлашга қаратилган чора-тадбирларни ўз ичига олади.