Фарғона шаҳридаги Ислом Каримов номли вилоят театр-концерт саройида “Бунёдкор аёл” хотин-қизлар миллий форуми бўлиб ўтди.

Мамлакатимизда биринчи маротаба ўтказилган ушбу тадбир мустақиллигимизнинг 34 йиллиги муносабати билан “Ватан учун, миллат учун, халқ учун!” деган ҳаётбахш ғоя остида ташкил қилинди. Унда шаҳар-туман ҳокими ўринбосарлари, фаол аёллар, тадбиркорлар, “Аёллар дафтари”га киритилган хотин-қизлар вакиллари иштирок этди.

— Айнан ижтимоий дафтарлар рўйхатига киритилган опа-сингилларимиз билан ишлашда вилоятда ўзига хос намуна ҳамда тажриба мактаби шаклланган, — дейди Фарғона вилояти ҳокими ўринбосари Комила Кавлонова. — Хусусан, биргина “Аёллар дафтари” билан ишлаш жараёнида юз минглаб хотин-қизлар бандилиги таъминланди, фаол тадбиркорликка жалб этилди.

Айни жараёнда ҳар бир маҳалла, оила кесимида тизимли иш ташкил этиш, кенг кўламли ислоҳотлар самарасини таъминлашда хотин-қизлар фаоллигини ошириш доимий вазифаларимиз сирасига киритилган. Бугунги тадбир ҳам бу борадаги эътибор ва рағбатнинг яна бир намунасидир.

Тадбирда Фарғона вилояти ҳокими Хайрулло Бозоров, Бош вазир ўринбосари – Оила ва хотин-қизлар қўмитаси раиси Зулайҳо Маҳкамова қатнашди.

Ботир МАДИЁРОВ

«Халқ сўзи»