Исроилнинг марказий ва жанубий ҳудудларида кенг кўламли ўрмон ёнғинлари бошланди. Ўт ўчирувчилар ёнғинни бартараф қилиш учун ҳукуматдан ҳарбийларни жалб қилишни сўрамоқда. Бу ҳақида «The Guardian» нашри хабар берди.

Билдирилишича, мазкур ёнғин сабаб мамлакатдаги бир қанча асосий йўллар, жумладан, Тел-Авив ва Қуддусни боғлаб турувчи асосий, 1-магистраль йўл тўлиқ ёпилган. Ўрмон ёнғинларини бартараф этиш учун ҳукумат томонидан 119 та ёнғин ўчириш гуруҳи ҳамда 10 дан ортиқ вертолёт жалб қилинган.

Ҳозирда мазкур ёнғин оқибатида бир неча киши жароҳатлангани тахмин қилинмоқда. Қурбонлар ҳақида маълумотлар йўқ. Ўт ўчирувчилар ёнғин кўламининг ортиб кетишидан хавотирга тушиб, ҳукуматдан ҳарбийларни ҳам сафарбар қилиш кераклиги юзасидан сўров юборган.

Маълум бўлишича, Исроилнинг «Месилат-Циона» ҳудудидаги ёнғин бугун тонгда бошланган ҳамда шамол туфайли бошқа ҳудудларга ҳам ўтган. Кучли шамол ёнғинни аввал ғарб томонга, сўнгра шарққа томон чўзилишига сабаб бўлган.

Шунингдек, Иэрусалимнинг ёнгин-қутқарув хизмати раҳбари Шмулик Фридманнинг таъкидлашича, ушбу ўрмон ёнғинларининг олди олинмаса мамлакат тарихида содир бўлган энг йирик ёнғинга айланиши мумкин.

Исроил бош вазири Бинямин Нетаняху ўрмон ёнғинлари авж ола бошлаганидан хавотирга тушиб, мамлакатда «миллий фавқулодда ҳолат» эълон қилган. Расмийларни эса Қуддус яқинида кенг тарқалаётган ёнғин шаҳаргача етиб келиши мумкинлигидан огоҳлантирган.

Исроилнинг «Magen David Adom» қутқарув агентлигининг хабар беришича, юзлаб тинч аҳоли вакилларининг ҳаёти хавф остида. Сабаби ёнғин кўлами тобора кенг майдонларга тарқалмоқда. Кўнгиллилар ҳамда қутқарувчилар барча имкониятдан фойдаланаётган бўлсалар ҳам, ҳозирча ёнғинни жиловлашнинг имконияти мавжуд эмас.

Сўнгги маълумотларга кўра, ёнғиндан зарар кўрган тахминан 23 кишига тиббий ёрдам кўрсатган, улардан 13 нафари эса касалхонага ётқизилган. Жабрланганларнинг аксарияти тутундан нафас олиш ва куйишдан азият чеккан. Улар орасида икки нафар ҳомиладор аёл ва бир ёшгача бўлган икки чақалоқ ҳам бўлган.

«Айни вақтда Исроил ҳукумати бир қанча давлатлардан, жумладан, Болгария, Греция, Италия, Хорватия ҳамда Кипрдан халқаро ёрдам сўраб мурожаат қилган», — дейилади нашр хабарида