Бугун, 21 октабрь куни “Насаф” клуби ОФК Элит чемпионлар лигаси мусобақасининг 3-тури доирасида Бирлашган Араб Амирликларининг “Шабаб Ал-Аҳли” жамоаси билан куч синашади. Келинг, бугун ушбу жамоа ҳақида бироз тўхталиб ўтамиз:

Тарихи

“Шабаб Ал-Аҳли” жамоаси 8 йиллик тарихга эга. Клуб 2017 йили Бирлашган Араб Амирликлари футболидаги энг номдор клублар — “Ал-Шабаб” ва “Ал-Аҳли”, шунингдек, “Дубай СК” клубларининг бирлаштирилишидан ташкил топган.

Ўзи клуб тарихида бир нечта клубларнинг бирлаштирилиши одат тусига кирган ҳолат десак адашмаган бўламиз. Сабаби ушбу клуб дастлаб 1970 йил “Ал-Ваҳда” ва “Ал-Шабаб” клублари бирлашишидан ташкил топган. 4 йил ўтиб, яна бир маҳаллий жамоа “Ал-Нажаҳ” ушбу жамоа билан бирлашган. Сўнгги бирлашув эса айтганимиздек, 2017 йилда юз берган.

Жамоанинг “олтин даври” сифатида 1973–1980 йиллар таъкидланади. Ушбу йиллар мобайнида “Ал-Аҳли” клуби 3 карра БАА чемпионлиги ва яна шунча Президент кубоги мусобақасида ғолиб бўлади.

Клуб 2009 йили Бирлашган Араб Амирликлари мезбонлиги остида ўтган Клублар ўртасидаги Жаҳон чемпионати мусобақасида иштирок этди ва биринчи ўйиннинг ўзидаёқ Янги Зеландиянинг “Окленд Сити” клубига мағлуб бўлиб, турнирни тарк этди.

Айни вақтда Ўзбекистон миллий терма жамоаси бош мураббийи сифатида ишлаётган Фабио Каннаваронинг ҳам ушбу клубга алоқадор томони бор. Итальян собиқ футболчиси 2010–2011 йилларда мазкур клубда тўп сурган.

Ушбу клубда тўп сурган эронлик футболчи Али Карими 2004 йил Осиёнинг энг яхши футболчиси номига сазовор бўлган. Худди шу тарзда 2015 йил БАА терма жамоаси етакчиси Аҳмад Ҳалил ҳам Осиёда йил футболчиси деб топилган. Сабаби, ўша йили Аҳмад терма жамоаси билан Осиё чемпионатида учинчи ўринни қўлга киритган. “Ал-Аҳли” билан эса Осиё чемпионлар лигаси финалида ўйнаган.

Клубнинг идентитети

Жамоага мухлислар томонидан “The Red Knights” (қизил рицарлар) деган ном берилган.

“Шабаб Ал-Аҳли” ўз уй учрашувларини Дубай шаҳридаги “Рашид” стадионида ўтказади. Ушбу майдон ўз бағрига 8 мингдан зиёд мухлисни сиғдира олади.

Жамоа Бирлашган Араб Амирликлари чемпионатининг 2 карра ғолиби, 3 карра Президент кубоги соҳиби ва яна 3 карра мамлакат Суперкубоги эгаси ҳисобланади. Бу, албатта, 2017 йилдан кейин қўлга киритилган совринлардир.

Халқаро майдонда

“Шабаб Ал-Аҳли” шу вақтга қадар Осиё Футбол Конфедерацияси томонидан ўтказиладиган расмий мусобақаларда 35 та ўйин ўтказган. 13 та ўйинда ғалаба қозонган, 7 та ўйин дубайликларнинг мағлубияти билан якунланган. 11 та баҳсда эса дуранг натижа қайд этилган.

Жамоа Ўзбекистон клублари билан шу вақтгача 6 марта ўзаро куч синашган. Ушбу ўйинларда қуйидаги натижалар қайд этилган:

“Пахтакор” 2:1 “Шабаб Ал-Аҳли” (2020)

“Шабаб Ал-Аҳли” 0:0 “Пахтакор” (2020)

“ОКМК” 2:1 “Шабаб Ал-Аҳли” (2021)

“Шабаб Ал-Аҳли” 3:1 “ОКМК” (2021)

“Насаф” 2:1 “Шабаб Ал-Аҳли” (2024)

“Шабаб Ал-Аҳли” 3:2 “Насаф” (2024)

Бош мураббийи

Жамоани айни пайтда 55 ёшли португалиялик мутахассис Паулу Соуза бошқармоқда. Ушбу мутахассис ўз вақтларида “КПР”, “Суонси Сити”, “Лестер Сити” каби АПЛ клубларида, шунингдек, “Салернитана” ва “Фиорентина” каби А Серия клубларида фаолият олиб борган.

Унинг бошқарувида Исроилнинг “Маккаби Тел-Авив” жамоаси ва Швейцариянинг “Базель” клуби ўз мамлакатлари олий лигасида чемпионликка эришган. Бирлашган Араб Амирликлари чемпионатида ўтган мавсум “Шабаб Ал-Аҳли” клуби айнан Соуза қўл остида чемпионликка эришган.

Футболчилар

“Шабаб Ал-Аҳли” клубида айни вақтда бир қатор Европа ва Осиё футболида ном қозонган футболчилар тўп сурмоқда.

Мунас Даббур — исроиллик футболчи. 1992 йилнинг 14 май куни туғилган. Фаолияти давомида “Зальцбург”, “Севилья”, “Ҳоффенҳайм” каби жамоаларда тўп сурган. 2019 йили “Зальцбург” сафида Австрия чемпионатининг энг яхши футболчиси деб топилган. 2019–2020 йилги мавсумда “Севилья” клуби билан Европа лигасида чемпион бўлган.

Сардор Азмун — эронлик футболчи. 1995 йил 1 январь куни туғилган. Фаолияти давомида Россиянинг “Рубин”, “Ростов”, “Зенит”; Германиянинг “Байер Леверкузен” ва Италиянинг “Рома” каби жамоаларида тўп сурган. “Зенит” билан қаторасига 4 марта Россия чемпионлигини қўлга киритган. 2020 йили Россия Премьер лигасида, 2024–2025 йилги мавсумда эса Осиё чемпионлар лигаси 2 турнирида мусобақа тўпурари бўлган.

Саид Иззатуллоҳи — эронлик футболчи. 1996 йилнинг 1 октябрь санаcида туғилган. Фаолияти давомида Россиянинг “Ростов”, “Амкар”, “Анжи” клубларида, шунингдек, Бельгия ва Дания чемпионатларида тўп сурган. 2014 йили бир муддат Испаниянинг дунёга машҳур “Атлетико Мадрид” жамоасида ҳам ўйнаган.

Федерико Картябия — 1993 йилнинг 20 январь куни туғилган. Фаолияти давомида “Кордоба”, “Валенсия”, “Депортиво” каби жамоаларда тўп сурган.

Ушбу клуб Ўзбекистон миллий терма жамоаси футболчилари учун ҳам бегона эмас. Яқин йиллар мобайнида “Шабаб Ал-Аҳли” сафида Одил Ҳамробеков, Жалолиддин Машарипов, Азиз Ғаниев каби Ўзбекистон терма жамоаси футболчилари фаолият олиб бордилар.

Эслатиб ўтамиз, ОФК Элит чемпионлар лигаси 3-туридан ўрин олган “Шабаб Ал-Аҳли” — “Насаф” ўйини 21-октабр куни бўлиб ўтади. Ушбу баҳс Тошкент вақти билан 21:00 да старт олиши кўзда тутилган.