2025 йил 30 апрель куни АҚШ ва Украина ўртасида муҳим иқтисодий келишув имзоланди. Унга кўра, АҚШ компаниялари Украинадаги ноёб қимматли минераллар ва табиий ресурсларга устувор равишда инвестиция киритиш ҳуқуқига эга бўлади. Келишув Украина томонидан Россия билан тинчлик музокараларини олиб боришда АҚШ президенти Дональд Трампнинг қўллаб-қувватлашини мустаҳкамлаш мақсадида амалга оширилди.

Трамп сўнгги пайтларда Украинадан ҳарбий ёрдам учун компенсация талаб қилган ва келишув Киев учун ушбу талаблар фонида стратегик аҳамият касб этади. Янги келишув АҚШ компанияларига алюминий, графит, нефть ва табиий газ каби асосий ресурслар билан боғлиқ янги инвестиция лойиҳаларида биринчи навбатда иштирок этиш ҳуқуқини беради.

Украина расмийларининг таъкидлашича, ушбу келишув мамлакат иқтисодий тикланишини жадаллаштириш ва АҚШнинг сиёсий ёрдамини сақлаб қолишда муҳим аҳамиятга эга.

АҚШ Молия вазири Скотт Бессент ўзининг Х саҳифасида Трампнинг бу йўналишдаги саъй-ҳаракатларини олқишлаб, шундай ёзди: «Бугун АҚШ ва Украина ўртасида тарихий иқтисодий ҳамкорлик келишуви имзоланди. Бу билан АҚШ-Украина Тикланиш Инвестиция Фонди ташкил этилди. Иқтисодий хавфсизлик – миллий хавфсизликдир».

Украина Иқтисодиёт вазири Юлия Свириденко ҳам Х ижтимоий тармоғида «Украина Ҳукумати номидан АҚШ–Украина Тикланиш Инвестиция Фондини ташкил этиш тўғрисидаги келишувни имзоладим. АҚШ билан биргаликда мамлакатимизга глобал сармояларни жалб этувчи Фондни яратмоқдамиз», деб ёзди.