Фото: Reuters

Киев вакиллари билан музокаралар якунига кўра, АҚШ Украинага ажратилган ёрдам учун ажратилган маблағларни қайтариш бўйича ўз талабларини уч баробарга қисқартирган. Бу ҳақда “Bloomberg” вазиятдан хабардор манбаларга таяниб хабар бермоқда.

“Ўтган ҳафта Вашингтонда бўлиб ўтган музокаралар якунига кўра, президент Дональд Трамп маъмурияти кўрсатилган ёрдам миқдорини 300 миллиард доллардан 100 миллиард долларга туширди”, — дейилади манбада.

Агентлик манбаларига кўра, Оқ уй Украинага қўйган талабларини юмшатган кўринади. Ҳозир бу миқдор Киевнинг ўзи айтганига яқин, яъни 90 миллиард доллардан ошади.

Вашингтон ва Киев расмийлари ўртасида минерал ресурслар бўйича келишув бўйича музокаралар ўтган ҳафта якунида бўлиб ўтди. “Reuters” хабарига кўра, АҚШ маъмурияти келишув лойиҳасига “Газпром” қувурининг Украина қисми устидан назоратни Европага топшириш талабини киритганлиги сабабли учрашувдаги муҳит “ўта кескин” бўлган. Шу боис унинг истиқболи заиф дея баҳоланмоқда.

Шу билан бирга, Украина бош вазирининг Европа ва Евроатлантика интеграцияси бўйича ўринбосари Олга Стефанишина келишувга эришиш учун қўшимча музокаралар ўтказиш зарур бўлса-да, айрим келишувларга эришилганини айтди.

Украина минерал ресурслари бўйича битим имзоланиши февраль ойи охирида, Оқ уйнинг Овал кабинетида Владимир Зеленский ва Дональд Трампнинг тортишувидан кейин тўхтаб қолди. Бироқ Трамп кейинроқ Киевдан келишувни имзолашини кутаётганини айтди.

Украина оммавий ахборот воситаларининг ёзишича, ҳужжатнинг янги таҳририда Киев Украинага кўрсатилган барча АҚШ ёрдами учун маблағларни қайтаришини назарда тутади. Бундан ташқари, у Украинани суверенитетининг бир қисмидан маҳрум қилади ва унинг келажакда Европа Иттифоқига кириш режаларига зид.

Украиналик журналистларнинг фикрича, тўловларни бошлаш ҳақидаги қарор прецедентга айланиши ва кейинчалик бошқа барча донорлар Киев режимидан ўз сармояларини қайтаришни талаб қилишлари мумкин.

Буюк Британиянинг “Spectator” журнали янги келишув шартларидан бири Украина фойдали қазилмаларини қазиб олувчи компанияларга уларни АҚШнинг “стратегик рақобатчилари”га сотишни тақиқлаш эканлигини таъкидлади. Нашрнинг фикрича, ҳозирда Вашингтон билан кескин муносабатларга эга Европа Иттифоқи ҳам шундай рақобатчилар тоифасига кириши мумкин.