Фото: AP

Исроил бош вазири Беньямин Нетаньяҳунинг Оқ уйга ташрифи чоғида АҚШ президенти БМТ агентликлари билан алоқалар ва маблағларни тўхтатиш ҳақидаги фармонни имзолаши кутилмоқда. Жумладан, АҚШ президенти Дональд Трамп БМТнинг Инсон Ҳуқуқлари Кенгаши билан алоқаларини тўхтатиб, ташкилотнинг фаластинлик қочқинлар бўйича агентлигини молиялаштиришдан тўхтатиши ҳам мумкин. Пул беришни тўхтатиш март ойигача давом этиши мумкин.

Трамп аллақачон АҚШни Жаҳон соғлиқни сақлаш ташкилоти ва Париж иқлим келишувидан чиқарди. БМТ Инсон Ҳуқуқлари Кенгашидан чиқиш ҳам Трамп учун янгилик эмас аслида.

АҚШ фаластинлик қочқинлар бўйича агентлигининг энг йирик донори бўлиб, йилига 300-400 миллион доллар ажратади, бироқ ўтган йил Исроил ва ҲАМАС уруши сабаб АҚШнинг собиқ президенти Жо Байден агентликка пул беришни тўхтатган эди. Ташкилот Ғазонинг тикланишида муҳим роль ўйнамоқда, чунки Исроил ҳамда ҲАМАС ўртасида мўрт сулҳ давом этмоқда.

Трамп ва Нетаньяҳу кутилаётган учрашув чоғида ўт очишни тўхтатиш келишувининг кейинги босқичини муҳокама қилишлари айтиляпти. Нетаньяҳунинг идораси сешанба куни маълум қилишича, Ғазода ўт очишни тўхтатиш бўйича келишувни давом эттиришни муҳокама қилиш учун Қатар пойтахти Доҳага юқори даражали делегация юборишга тайёрланмоқда.