«Apple» компанияси ўзининг бюджетли, сунъий интеллект функцияларига эга янги телефони — «iPhone 16e»ни расман тақдим этди. Бу ҳақда «Reuters» хабар берди.

Хабар қилинишича, ушбу модел, асосан, АҚШдаги ва муҳим ўсиш бозорлари ҳисобланган Хитой ҳамда Ҳиндистондаги ўрта сегмент мижозларини қайтариб олиш мақсадида ишлаб чиқилган. «iPhone 16e» «Apple»нинг бюджет линиясида илгари ишлатилган SE номлаш анъаналаридан воз кечиб, янги ўзига хос модел сифатида тақдим этилди.

«iPhone 16e» Андроид смартфонлари билан рақобатлашишга мўлжалланган бўлиб, айни пайтда «Samsung» ва Хитойнинг «Huawei» компаниялари ҳам ўз қурилмаларига сунъий интеллект функцияларини қўшаётган бир вақтда чиқарилди. Сўнгги чоракда «Apple» телефонларининг сотувлари камайган. Бюджет линиясидаги моделларнинг даромад улуши эса сўнгги ўн йил ичида сезиларли равишда пасайган. «Apple» мазкур тенденцияни ўзгартириш мақсадида «iPhone 16e»ни ишлаб чиқди.

Янги «iPhone 16e» нархи АҚШда 599 доллар бўлиб, аввалги SE моделига нисбатан 170 долларга қимматроқ. Шунга қарамасдан, унинг имкониятлари деярли флагман моделларга тенг.

Телефон «Apple Intelligence» тизими билан ишлаш учун мўлжалланган кучли А18 процессори билан жиҳозланган. «Apple Intelligence» фойдаланувчиларга «ChatGPT» хизматига тўғридан-тўғри кириш имконини беради. «iPhone 16e» флагман моделларга жуда ўхшаш дизайнга эга бўлиб, фақатгина кенг бурчакли камера йўқлиги, битта камроқ тугма ва бироз фарқ қилувчи дисплей билан ажралиб туради.

«iPhone 16e» ҳозирда қора ва оқ рангларда тақдим этилади. Бу модел, сентябрь ойида тақдим этилган энг арзон «iPhone 16» дан деярли 200 АҚШ доллар арзон бўлиб, харидорлар учун қулай нарх оралиғини тақдим этади. Флагман моделларда эса турли хил ёрқин ранглар мавжуд. «iPhone 16e» «Apple» томонидан ишлаб чиқилган биринчи C1 модем чипига эга бўлиб, бу «Apple»нинг «Qualcomm» компаниясидан мустақиллашиш йўлидаги муҳим қадами ҳисобланади. Ушбу Q1 чип мобил алоқалар учун ишлаб чиқилган ва «Apple»нинг ички модем технологиясига асосланган.

«Apple» акциялари янги телефон тақдим этилганидан сўнг, савдоларда деярли ўзгаришсиз қолди. Шунга қарамай, компания ўтган ойда келгуси даврда «iPhone» сотуви ўсишини башорат қилган эди. Бу эса сунъий интеллект функсияларининг кўпроқ минтақаларда ва тилларда жорий этилиши билан боғлиқ. Шунга қарамасдан, таҳлилчилар «Apple»нинг сунъий интеллект функсияларини жорий этишда секин ҳаракат қилаётганини ҳам таъкидлашмоқда. Айниқса, Хитой бозорида СИ функсияларини фаол ишлатиш учун ҳали ҳам маълумотлар базаси ҳамкорини топмаган.

«Forrester» таҳлилчиси Дипанжан Чаттержее таъкидлашича, «Apple» фойдаланувчиларнинг янги моделларни сотиб олишга бўлган қизиқишини сезиларли даражада оширишни хоҳламоқда. «iPhone 16e» нархининг нисбатан арзонлиги кўплаб фойдаланувчилар учун «Apple Intelligence» тизимига кириш имконини яратади. «Counterpoint Research» маълумотларига кўра, «Apple»нинг SE моделидан олинадиган даромад 2016 йилдаги 10 фоиздан 2023 йилда атиги 1 фоизгача камайган.

Янги «iPhone 16e» айниқса Европа ва Хитой каби нархга сезгир бозорлар учун мўлжалланган бўлиб, бу янги модел Ҳиндистон бозорида ҳам катта қизиқиш уйғотиши кутилмоқда.

«Apple» томонидан кутилаётган «iPhone 16e» модели сунъий интеллект функсияларини қўллаб-қувватлайдиган арзонроқ телефон излаётган мижозлар учун идеал танлов бўлиши мумкин. Янги технологиялар ва кучли протсессор билан жиҳозланган «iPhone 16e» келгусида компания сотувларини оширишга ёрдам бериши кутилмоқда.