2026 йилнинг март ойида истеъмол секторидаги товарлар ва хизматлар нархлари ўртача 0,6 фоизга ошган. Бу ҳақида Миллий статистика қўмитаси маълумот берди.

Унда айтилишича, йиллик истеъмол нархлари индекси 107,1 фоизни ташкил этиб, ўтган йилнинг шу ойига (2025 йил март — 110,3 фоиз) нисбатан 3,2 фоиз бандга пасайган. Март ойида озиқ-овқат маҳсулотлари нархлари ўртача 1,2 фоизга, ноозиқ-овқат товарлари 0,3 фоизга ҳамда аҳолига кўрсатиладиган пуллик хизматлар эса 0,2 фоизга қимматлашган.

Асосий озиқ-овқат маҳсулотларидан помидор (11,5 фоиз), булғор қалампири (10,0 фоиз), картошка (9,8 фоиз), қовоқ (9,4 фоиз), олма (7,4 фоиз), банан (6,0 фоиз), лимон (4,4 фоиз), товуқ тухуми (2,1 фоиз), мол гўшти (суяксиз гўштдан ташқари) (1,8 фоиз), балиқ (1,7 фоиз), шакар (1,7 фоиз), қўй гўшти (1,2 фоиз), кунгабоқар ёғи (1,0 фоиз), кафе, ошхоналар, кафетерийлар ва газакхоналардаги тайёр таомлар (0,8 фоиз) ва биринчи навли буғдой уни (0,6 фоиз) нархларининг ошиши инфляцияга асосий таъсир кўрсатган.

Асосий озиқ-овқат маҳсулотларидан инфляцияни пасайтирувчи омил сифатида бодринг (-20,7 фоиз), карам (-4,7 фоиз) ва пиёз (-4,6 фоиз) нархларининг пасайиши муҳим ҳисса қўшган. Ноозиқ-овқат маҳсулотлар нархларидан томир кенгайтирувчи препаратлар (0,9 фоиз), аёллар учун кўйлаклар (0,8 фоиз) ҳамда цемент (0,8 фоиз) нархлари ўсиши, шунингдек, пропан (-3,2 фоиз), АИ-92 маркали бензин (-0,9 фоиз) нархи пасайиши ҳам кузатилган.

Шунингдек, хизматлар нархи ва тарифларида маиший чиқинди учун ҳақ тўлаш (0,9 фоиз) ва бўяш ишлари хизматлари (0,9 фоиз) нархлари ошиши ҳамда ички ва халқаро йўловчи ҳаво транспорти (-4,1 фоиз) тарифлари нархлари пасайиши асосий омил бўлиб хизмат қилган. Ҳисоб-китоблар учун 10 мингдан ортиқ савдо ва хизмат кўрсатиш нуқталаридан 1,2 млнга яқин нархлар қайд этилган. 419 турдаги озиқ-овқат ва ноозиқ-овқат маҳсулотлари ва 98 турдаги хизматлар нархлари бўйича кузатув ўтказилган.