Россиянинг Санкт-Петербург шаҳрида уч нафар вояга етмаган фарзанди билан мураккаб вазиятда қолган ўзбекистонлик аёл Ватанга қайтарилди. Бу ҳақда «Дунё» ахборот агентлиги хабар берди.

Маълум бўлишича, Ўзбекистон фуқароси Р.З. 2020 йилда ишлаш учун Санкт-Петербургга келган. 2020–2025 йиллар оралиғида у уч бор фарзандли бўлган. Бироқ, мураккаб ҳаётий вазият туфайли болаларнинг туғилганлик тўғрисидаги гувоҳномалари ўз вақтида расмийлаштирилмаган.

Шу сабабли, болаларнинг шахсни тасдиқловчи ҳужжатлар бўлмаган. Бу эса, ўз навбатида, уларни вақтинча давлат идоралари қармоғига олиш ва вояга етмаганлар учун ихтисослаштирилган муассасага юборишга сабаб бўлган.

Ўзбекистоннинг Санкт-Петербургдаги Бош консулхонаси томонидан олиб борилган саъй-ҳаракатлар натижасида дипломатлар вазиятга зудлик билан аниқлик киритиб, Р.З. ва унинг уч нафар вояга етмаган фарзандининг ҳуқуқларини ҳимоя қилиш бўйича комплекс чора-тадбирлар амалга оширилди.

Мазкур иш Санкт-Петербургнинг Василеостровский туман судида кўриб чиқилган. Суд жараёнида Бош консулхона ходимлари болаларнинг шахсини ва қариндошлик алоқаларини тасдиқловчи ҳужжатларни тақдим этиб, болаларни оила муҳитига қайтариш зарурлиги асослаб берилди.

Судда ижобий қарор қабул қилганидан сўнг, она ва унинг фарзандлари Ўзбекистонга қайтарилди.