Кеча, 28 март куни Осиё минтақасининг бир қатор терма жамоалари халқаро ўртоқлик ўйинларида майдонга тушишди. Жумладан, Қирғиз Республикаси терма жамоаси Бишкек шаҳрида Мадагаскар терма жамоаси билан ўртоқлик ўйини ўтказди. Учрашув 2:5 ҳисобида Африка вакилининг ғалабаси билан якунланди.

Ғолиблардан голларга Веран Кадди (2 та), Клемент Кутюрье, Томас Фонтен ва Арно Рандрианантенаина муаллифлик қилди. Қирғиз Республикаси терма жамоасининг жавоб голлари эса Бекназ Алмазбеков ва Бектур Кочмонбаев ҳисобига ёзилди.

Англиянинг Милтон-Кейнс шаҳрида ўтган ўйинда эса Жанубий Корея терма жамоаси Африка вакили Кот-дʼИвуар термасидан йирик мағлубият қабул қилиб олди. Баҳс корейсларнинг 0:4 ҳисобидаги мағлубияти билан тугади.

Ғолиблардан голларга Вилфрид Синга, Марсьяль Годо, Симон Адингра ва Эванн Гессан муаллифлик қилди.

Осиёнинг биринчи рақамли жамоаси Япония эса кеча Глазго шаҳрида Шотландия термаси меҳмони бўлди. Учрашув 1:0 ҳисобида "самурайлар"нинг ғалабаси билан якунланди. Ўйинда киритилган ягона голга "Генк" футболчиси Жунъя Ито муаллифлик қилди.