Kecha, 28-mart kuni Osiyo mintaqasining bir qator terma jamoalari xalqaro oʻrtoqlik oʻyinlarida maydonga tushishdi. Jumladan, Qirgʻiz Respublikasi terma jamoasi Bishkek shahrida Madagaskar terma jamoasi bilan oʻrtoqlik oʻyini oʻtkazdi. Uchrashuv 2:5 hisobida Afrika vakilining gʻalabasi bilan yakunlandi.

Gʻoliblardan gollarga Veran Kaddi (2 ta), Klement Kutyurye, Tomas Fonten va Arno Randrianantenaina mualliflik qildi. Qirgʻiz Respublikasi terma jamoasining javob gollari esa Beknaz Almazbekov va Bektur Kochmonbayev hisobiga yozildi.

Angliyaning Milton-Keyns shahrida oʻtgan oʻyinda esa Janubiy Koreya terma jamoasi Afrika vakili Kot-dʼIvuar termasidan yirik magʻlubiyat qabul qilib oldi. Bahs koreyslarning 0:4 hisobidagi magʻlubiyati bilan tugadi.

Gʻoliblardan gollarga Vilfrid Singa, Marsyal Godo, Simon Adingra va Evann Gessan mualliflik qildi.

Osiyoning birinchi raqamli jamoasi Yaponiya esa kecha Glazgo shahrida Shotlandiya termasi mehmoni boʻldi. Uchrashuv 1:0 hisobida “samuraylar”ning gʻalabasi bilan yakunlandi. Oʻyinda kiritilgan yagona golga “Genk” futbolchisi Junʼya Ito mualliflik qildi.