Болалар иштирокида содир этилиши мумкин бўлган йўл-транспорт ҳодисаларини олдини олишда мактаб педагог-ходимларининг ўқувчиларга берадиган сабоқлари муҳим аҳамиятга эга. Сирдарё вилоятида айни шу жиҳат эътиборга олинган ҳолда ўқитувчиларнинг йўл ҳаракати қоидалари бўйича билим ҳамда кўникмаларини янада мустаҳкамлаш мақсадида улар учун махсус ўқув машғулотлари ташкил этилмоқда.

— Мазкур ўқув жараёнлари Ўзбекистон Республикаси Ички ишлар вазирлиги ҳамда Мактабгача ва мактаб таълими вазирлиги ҳамкорлигида ўтказилмоқда, — дейди  Сирдарё вилояти ИИБ ЖХХ ЙҲХБ Ахборот хизмати бошлиғи, катта лейтенант Муҳриддин Пирматов. — Албатта, Сирдарё вилояти ички ишлар бошқармаси жамоат хавфсизлиги хизмати йўл ҳаракати хавфсизлиги бошқармаси ходимлари томонидан ўтказилаётган мазкур ўқув тадбирлари кутилган самарани беради. Яъни педагоглар машғулотларда йўл ҳаракати қоидалари бўйича олган билим ҳамда кўникмаларини ўқувчиларга етказиб, болалар ўртасида содир этилиши мумкин бўлган ЙТҲларни олдини олишга ўзларининг катта ҳиссаларини қўшадилар.

Айни ўқув машғулотларидан бири Мирзаобод туманидаги 1- умумтаълим мактабида бўлиб ўтди. Унда тумандаги турли мактаблардан 200 нафардан ортиқ ўқитувчи қатнашди.

Аҳмадали ШЕРНАЗАРОВ, «Халқ сўзи».