Bolalar ishtirokida sodir etilishi mumkin boʻlgan yoʻl-transport hodisalarini oldini olishda maktab pedagog-xodimlarining oʻquvchilarga beradigan saboqlari muhim ahamiyatga ega. Sirdaryo viloyatida ayni shu jihat eʼtiborga olingan holda oʻqituvchilarning yoʻl harakati qoidalari boʻyicha bilim hamda koʻnikmalarini yanada mustahkamlash maqsadida ular uchun maxsus oʻquv mashgʻulotlari tashkil etilmoqda.

— Mazkur oʻquv jarayonlari Oʻzbekiston Respublikasi Ichki ishlar vazirligi hamda Maktabgacha va maktab taʼlimi vazirligi hamkorligida oʻtkazilmoqda, — deydi Sirdaryo viloyati IIB JXX YHXB Axborot xizmati boshligʻi, katta leytenant Muhriddin Pirmatov. — Albatta, Sirdaryo viloyati ichki ishlar boshqarmasi jamoat xavfsizligi xizmati yoʻl harakati xavfsizligi boshqarmasi xodimlari tomonidan oʻtkazilayotgan mazkur oʻquv tadbirlari kutilgan samarani beradi. Yaʼni pedagoglar mashgʻulotlarda yoʻl harakati qoidalari boʻyicha olgan bilim hamda koʻnikmalarini oʻquvchilarga yetkazib, bolalar oʻrtasida sodir etilishi mumkin boʻlgan YTHlarni oldini olishga oʻzlarining katta hissalarini qoʻshadilar.

Ayni oʻquv mashgʻulotlaridan biri Mirzaobod tumanidagi 1- umumtaʼlim maktabida boʻlib oʻtdi. Unda tumandagi turli maktablardan 200 nafardan ortiq oʻqituvchi qatnashdi.

Ahmadali ShERNAZAROV, “Xalq soʻzi”.