Бугундан Тошкент шаҳрида жойлашган «Бунёдкор» ва «Пахтакор» стадионларида FIFA Series мусобақаси ўйинлари бошланади. Кеча, Ўзбекистон миллий терма жамоаси бош мураббийи Фабио Каннаваро ушбу мусобақа олдидан матбуот анжуманида иштирок этди.

Бош мураббий дастлаб қуйидаги фикрларни билдириб ўтди:

«Кеч қолганим учун узр. Ўртоқлик ўйинлари бўлишига қарамай, энг яхши ўйинимизни намойиш этишга ҳаракат қиламиз. Кўпроқ нарса ўрганиб олишимиз керак. Мундиал яқинлигини тушуниб турибмиз. Ғалаба қозонишга ҳаракат қиламиз».

Журналистларнинг йиғинда кўплаб марказий ярим ҳимоячилар жалб этилгани, лекин қанот ярим ҳимоячилари камлиги тўғрисидаги саволига эса мураббий қуйидагича жавоб берди:

«Айрим ҳолатларда ўйин давомида услубимизни ўзгартиришга қарор қиламан. Шу сабабли кўплаб янгиликлар қилиб кўриш учун марказдаги ўйинчилар қўл келади. Шунингдек, бу сафар ҳужумчиларимиз бир нафарга кўпроқ».

Габон термасининг бир қатор футболчилари мусобақага келишмади. Уларнинг йўқлиги жамоага қанчалик фойда беради, қабилидаги саволга Каннаваро шундай жавоб қайтарди:

«Очиғини айтаман, мен ўз жамоамни ўйинга тайёрлаш билан бандман. Рақиб ҳақида ўйлашни истамайман, сабаби ўз жамоам ҳақида қайғуришим лозим. Габон сўнгги учрашувларда қандай иштирок этганини ўрганиб чиқдик. Обамеянг — энг яхши ҳужумчилардан бири. Биз эса ўз устимизда ишлашимиз ва камчиликларимизни яхшилашимиз керак. Биз ўйинга 100 фоиз тайёр бўлишимиз керак.

Футболни номлар ўйнамайди. Муҳими, майдондаги ўйин сифати. Баъзан номдор футболчига эга бўлмаган жамоаларга паст назар билан қараш бўлади, бундай бўлиши мутлақо нотўғри. Биз майдонда тўлиқ концентрация билан ҳаракатланишимиз керак».

Шунингдек, Фабио Каннаваро жароҳат олган футболчиларга тўхталиб қуйидагиларни маълум қилди:

«Сўнгги бир ой давомида кўплаб футболчиларни кузатиб бордим. Ўтган ой жароҳатланган футболчиларимиз жарроҳлик амалиётини ўтказган Рим шаҳрида ҳам бўлдим. Менимча, мен ҳар бир футболчи билан имконият қадар кўпроқ гаплашишим керак. Ҳар бир футболчи унга ишонишаётганини ҳис қилиши керак. Терма жамоанинг эшиклари барча учун очиқ. Албатта, ўзим йиғадиган жамоа ва таркиб бўлади. Лекин барчани кузатиб боришим ҳам керак.

Аббос мен терма жамоага келганимдан бери деярли ҳар доим жароҳатда. Бизда 2-3 нафар футболчи бор, аммо жароҳатланганларнинг ўрнини боса оладиган футболчиларни ҳам тайёрлаб боришимиз керак. Билмайман, улар мундиалга борадими ёки йўқ. Бироқ мен уларга имконият қадар ёрдам беришга ва ЖЧнинг бир қисми бўлишга ҳаракат қиламан. Сўнгги сонияларгача улар мундиалга борадиган рўйхат ичида бўлишади. Охирида эса қарор қабул қилинади. Барчанинг имконияти тенг».

Таъкидлаш керакки, март ойидаги йиғин FIFA календари бўйича Жаҳон чемпионати олдидан сўнгги FIFA кунлари доирасида ташкил этилмоқда. Журналистлар шундан келиб чиққан ҳолда ушбу йиғинга жалб этилган футболчиларни Жаҳон чемпионатида қатнашувчи таркибнинг асоси деб ҳисобласак бўладими, деб савол беришди. Каннаваронинг жавоби эса қуйидагича бўлди:

«Йўқ, менда 55 нафар футболчидан иборат рўйхат бор. Ҳамма нарса рўй бериши мумкин. Бунга тайёр бўлишимиз керак. Жорий мавсум давомида қайсидир футболчи ўзини яхши томонлама намойиш этса ва ёрқин ўйин кўрсатса, уни рўйхатга қўшишим мумкин. Рўйхатни ўзгартириш мен учун муаммо эмас».

Анжуман якунида Каннаваро Ўзбекистон Суперлигаси ва маҳаллий футболчиларнинг савияси ҳақида ўз фикрларини билдирди:

«Агар футболчи Европада ўйнаса, демак, у ҳақиқатан ҳам кучли. Суперлиганинг асосий муаммоларидан бири — интенсивлик. Ўйин темпи юқори даражада эмас. Футболчиларнинг жисмоний ҳолати ҳар доим ҳам яхши эмас.

Ўтган ой Рамазон бўлди ва кўплаб футболчилар рўза тутишди. Шу сабабли Суперлига учрашувларидаги ўйин темпи паст эди.

Маҳаллий футболчиларга ҳар доим ўз устида ишлашлари кераклигини айтаман. Мени хавотирга солаётган нарса шу. Жисмоний ҳолатимизни яхшилашимиз керак.

Мундиалга уч ҳафта қолганида бу муаммога ечим топа олмаймиз. Биз январ ойидан буён ушбу муаммони бартараф этиш устида бош қотиряпмиз».