Фото: Президент матбуот хизмати

Ўзбекистон Президенти Шавкат Мирзиёев айни дамда АҚШ Тинчлик институтида бўлиб ўтаётган «Тинчлик кенгаши»нинг биринчи йиғилишида нутқ сўзламоқда. Ушбу тадбир Оқ уй томонидан тўғридан тўғри ёритилмоқда.

Давлатимиз раҳбарининг қайд этишича, Ўзбекистон «Тинчлик кенгаши»ни тузиш бўйича тинчликпарвар ташаббусни қўллаб-қувватлайди ва уни муваффақиятли амалга оширишда амалий иштирок этиш ниятини қатъий билдиради.

«Америка Қўшма Штатлари Президенти Дональд Трампга кенгашнинг илк йиғилишини чақиргани учун самимий миннатдорлик изҳор этишга ижозат бергайсиз. Шубҳасиз, бугунги саммит – Президент Трампнинг сиёсий иродаси ва прагматизми натижасидир», деди Ўзбекистон раҳбари нутқида.

Шавкат Мирзиёевнинг таъкидлашича, Кенгаш фаолияти Ғазо секторида иқтисодий ва ижтимоий тикланиш учун қулай шароит яратишга хизмат қилади.

Ўзбекистон Президенти, шунингдек, ҳар қандай ташқи бошқарув механизми маҳаллий аҳоли қўллаб-қувватловида амалга оширилишини ҳамда мувофиқлаштирилган саъй-ҳаракатлар урушдан кейинги жараён барқарорлигини таъминлаб, Ғазони тезроқ тиклаш учун шароит яратишини билдирди.

Бундан ташқари, Ўзбекистон турар жойлар, болалар боғчалари, мактаблар ва шифохоналар қурилишига ўз ҳиссасини қўшишга тайёр экани маълум қилинди.