Рамазон ойида таровеҳ намозлари ўқиладиган масжидларни узлуксиз электр энергияси билан таъминлаш учун ҳар бир масжидга бир нафардан навбатчи энергетик ходим бириктирилди. Бу ҳақда Энергетика вазирлиги матбуот хизмати хабар берди.

Маълум қилинишича, вазирликда истеъмолчиларни энергия ресурслари билан узлуксиз ва барқарор таъминлаш чора-тадбирларига бағишланган йиғилиш бўлиб ўтган. Унда Энергетика вазири Ж.Мирзамаҳмудов, Бош прокурор ўринбосари С.Самадов, «Ўзенергоинспекция» ҳамда ёқилғи-энергетика соҳасидаги барча акциядорлик жамиятлари раҳбарлари қатнашган.

Йиғилишда қайд этилишича, Рамазон ойига тайёргарлик ишлари давомида ёқилғи-энергетика объектларидаги асосий ва ёрдамчи қурилмаларнинг ишончли фаолиятини таъминлаш, аҳоли ва улгуржи истеъмолчиларга энергия ресурсларини узлуксиз етказиб бериш бўйича зарур чоралар кўрилган.

Хусусан, икки мингдан ортиқ жоме масжидларда электр таъминоти барқарорлигини таъминлаш мақсадида тақсимлаш тармоқлари тўлиқ кўрикдан ўтказилиб, аниқланган камчиликлар бартараф этилган. Шунингдек, таровеҳ намозлари ўқиладиган масжидларни узлуксиз электр энергияси билан таъминлаш учун ҳар бир масжидга бир нафардан навбатчи энергетик ходим бириктирилган. Объектларга зарур ҳолатларда дизель генераторларини ўрнатиш чоралари кўрилади.

Қўшимча қилинишича, мазкур масжидларда 2547 нафар муҳандис-техник ходимдан иборат навбатчилик ташкил этилган. Шу билан бирга, 210 та тезкор авариявий чиқиш бригадаси шакллантирилиб, уларга 250 та автомобиль ва махсус техника бириктирилган.