Ramazon oyida taroveh namozlari oʻqiladigan masjidlarni uzluksiz elektr energiyasi bilan taʼminlash uchun har bir masjidga bir nafardan navbatchi energetik xodim biriktirildi. Bu haqda Energetika vazirligi matbuot xizmati xabar berdi.

Maʼlum qilinishicha, vazirlikda isteʼmolchilarni energiya resurslari bilan uzluksiz va barqaror taʼminlash chora-tadbirlariga bagʻishlangan yigʻilish boʻlib oʻtgan. Unda Energetika vaziri J.Mirzamahmudov, Bosh prokuror oʻrinbosari S.Samadov, “Oʻzenergoinspeksiya” hamda yoqilgʻi-energetika sohasidagi barcha aksiyadorlik jamiyatlari rahbarlari qatnashgan.

Yigʻilishda qayd etilishicha, Ramazon oyiga tayyorgarlik ishlari davomida yoqilgʻi-energetika obyektlaridagi asosiy va yordamchi qurilmalarning ishonchli faoliyatini taʼminlash, aholi va ulgurji isteʼmolchilarga energiya resurslarini uzluksiz yetkazib berish boʻyicha zarur choralar koʻrilgan.

Xususan, ikki mingdan ortiq jome masjidlarda elektr taʼminoti barqarorligini taʼminlash maqsadida taqsimlash tarmoqlari toʻliq koʻrikdan oʻtkazilib, aniqlangan kamchiliklar bartaraf etilgan. Shuningdek, taroveh namozlari oʻqiladigan masjidlarni uzluksiz elektr energiyasi bilan taʼminlash uchun har bir masjidga bir nafardan navbatchi energetik xodim biriktirilgan. Obyektlarga zarur holatlarda dizel generatorlarini oʻrnatish choralari koʻriladi.

Qoʻshimcha qilinishicha, mazkur masjidlarda 2547 nafar muhandis-texnik xodimdan iborat navbatchilik tashkil etilgan. Shu bilan birga, 210 ta tezkor avariyaviy chiqish brigadasi shakllantirilib, ularga 250 ta avtomobil va maxsus texnika biriktirilgan.