Фото: «Динамо» ФК

Аввалроқ Самарқанднинг «Динамо» клуби жинсий зўравонликда айбланиб, жазо ўтаб чиққан ганалик футболчи Кингсли Сарфони ўз сафига қўшиб олгани ҳақида хабар берилган эди. Клуб бу борадаги турли миш-мишлар юзасидан расмий муносабат билдирди.

Билдирилишича, «Динамо» ПФК ганалик 30 ёшли легионер Кингсли Сарфо билан жорий йилнинг январь ойида бир йиллик шартнома имзолаган. Клуб раҳбарияти футболчи билан шартнома имзолашдан аввал унинг спорт карьерасидаги фаолияти билан танишиб, Сарфонинг майдондаги ҳаракатларини таҳлил қилиб ўрганган. Жамоа у билан ўйинини кучайтириши борасида хулосага келгач, келишув имзоланган. Бироқ клуб унинг қарийб 10 йил аввалги ўтмишидан хабардор бўлмаган.

Футболчининг тасдиқлашича, бундан 9 йил аввал – 2017 йил Швециядаги фаолияти давомида бир қиз билан яқин муносабатда бўлган. Швеция қонунчилигига кўра, ўшанда қиз вояга етган деб ҳисобланишига яна бир йилдан камроқ вақт бўлган. Шу боис африкалик футболчининг ўзаро розилик асосидаги яқинлашуви Швецияда омма эътиборига тушиб, мамлакат қонунчилиги асосида жинсий зўравонлик сифатида малакаланган.

Суд ишида Сарфо қизнинг вояга етмаганидан хабари бўлмаганини исботлагач, у 32 ойга қамоқ жазоси ва жаримага тортилган. Аммо якунда 1 йилу 10 ойда озодликка чиқарилган. Яъни, у қилмиши учун жазони ўтаган.

Шундан кейин у ўтган 6 йил давомида Европадаги фаолияти давомида «Олимпиакос», АПОЭЛ клублари сафида муваффақиятли фаолият юритган, ҳатто мамлакат чемпиони бўлган. Европа Чемпионлар лигаси ва еврокубок баҳсларида майдонга тушган.

«Кингсли ҳозиргача ўз мамлакати Ганада хайрия ишларида фаоллик кўрсатмоқда. Сарфо билан шартнома имзоланганидан қарийб уч ҳафта ўтиб, бу хабарлар кетма-кет тарқатилгани нега ёки кимга керак бўлгани сабаби клуб учун мавҳум», дейилади Самарқанд клуби баёнотида.

Бундан ташқари, катта аудиторияга эга расмий ва норасмий Telegram каналлар, блогерлар ва турли манбалардан эълон қилинган сарлавҳа, хабар ва постларда шахс шаъни, қадр-қимматини ёки тарихини таҳқирловчи оммавий чиқишлар ва ҳаракатлар Ўзбекистон Республикаси қонунчилигига кўра жавобгарликка сабаб бўлишини унутмасликни сўралган.

«Майдон ва унинг ташқарисидаги ҳалол кураш ва шаффоф рақобат принципи асосида ривожланишнинг янги босқичига кўтарилишга интилаётган «Динамо» ПФКни салбий бўёқда кўрсатишга бўлган уринишларни клуб имижига путур етказиш сифатида баҳолаб, ўз ҳақ-ҳуқуқини амалдаги қонунларга кўра тегишли органлар орқали ҳимоя қилишга тайёрлигини билдиради», деб ёзади жамоа матбуот хизмати.

Шунингдек, «Динамо» ганалик яримҳимоячини «сотиб олгани» ёки «трансфер қилгани» ҳақидаги хабарлар асоссиз экани маълум қилинган. Билдирилишича, Кингсли Сарфо жамоа сафига эркин агент сифатида келиб қўшилган.