Ангренда июль ойида жинсий зўравонлик қурбони бўлган ва ҳозирда Республика ихтисослаштирилган тиббиёт марказида даволанаётган 15 ёшли қизнинг соғлиғида ижобий ўзгаришлар кузатилмоқда.

2025 йил июль ойида ангренлик қиз бир неча марта (аввал қариндоши, кейин эса бир гуруҳ йигитлар томонидан) зўравонликка учрагани ҳақида хабар берилган эди.

Болалар омбудсмани Сурайё Раҳмонова 18 ноябрь куни шифохонага бориб, унинг ҳолати билан шахсан танишди.

Болалар омбудсмани маълум қилинишича, қизнинг умумий аҳволи барқарорлашган, тана вазни ошган ва босқичма-босқич руҳий инқироз ҳолатидан чиқиб боряпти. Психологлар томонидан мунтазам олиб борилаётган муолажалар ҳам фойда беряпти.

Қиз ота-онаси ва яқинларига нисбатан эмоционал муносабати, ишонч даражаси, келгусида қайси оилавий муҳитда яшашни исташи ҳақида фикрини билдирган. Мутахассислар унинг травматик ҳолатдан тўлиқ чиқиши учун даволанишдан кейин хавфсиз ва нейтрал муҳитда яшагани маъқул эканлигини билдирган.

Бу иш бўйича тергов ишлари тугаган ва тўпланган материаллар судга юборилган. Ҳозир суд муҳокамаси давом этмоқда. Болалар омбудсмани бу жараёнда қатнашишини ва қизни хавфсиз муҳитга жойлаштириш бўйича назоратни давом эттиришини маълум қилди.