Фото: Getty Images

Россия президенти Владимир Путин ва АҚШ президенти Дональд Трампнинг Будапештдаги учрашувига тайёргарлик тўхтатилган. Бу ҳақда «NBC News» журналисти Гаррет Ҳааке Оқ уйнинг юқори мартабали мулозимига таянган ҳолда маълум қилди.

Ҳаакенинг аниқлик киритишича, АҚШ Давлат котиби Марко Рубио ва Россия ташқи ишлар вазири Сергей Лавров ўртасида учрашув олдидан телефон орқали мулоқот бўлиб ўтган. Журналистнинг сўзларига кўра, уларнинг суҳбати «самарали» бўлган, бироқ Трамп ҳозирги босқичда «ҳар икки томон ҳам музокараларга етарлича тайёр эмаслигини» ҳис қилган.

«Будапештда бўлиб ўтадиган Трамп — Путин саммитини режалаштириш ҳозирча тўхтаб қолган» — дейди Гаррет Ҳааке.

«Axios» портали, шунингдек, АҚШ расмийларига таяниб, Путин ва Трамп яқин келажакда учрашишни режалаштирмаётгани ҳақида хабар берди. Шунингдек, CNN телеканали Россия ва АҚШ раҳбарларининг учрашуви қолдирилиши мумкинлиги ҳақида хабар берди.

Саммит тўхтатилишининг эҳтимолий сабаби маълум

Россия ва АҚШ етакчиларининг учрашувига тайёргарлик Москванинг Украинада зудлик билан ўт очишни тўхтатишдан бош тортгани сабабли бекор қилинган бўлиши мумкин, дея хабар бермоқда «Reuters» агентлиги дипломатларга таяниб. Шу билан бирга, манба учрашувни бекор қилиш ҳақида расман маълумот берилмаганини ҳам қайд этди.

«Иккала томон ҳам Трамп ва Путин ўртасидаги учрашувни ташкил этиш режаларидан очиқчасига воз кечгани йўқ ва Венгрияда саммит ташкил этиш ҳаракатлари давом этаётганга ўхшайди», — дейилади «Reuters» хабарида.

Бироқ, мақола муаллифларига кўра, Россия ташқи ишлар вазири Лавров ва АҚШ Давлат котиби Марко Рубио учрашувининг кейинга қолдирилгани, агар Москва бироз ён босмаса, АҚШ Путин — Трамп саммитига мезбонлик қилишга тайёр эмаслигидан далолат бериши мумкин. CNN маълумотларига кўра, Давлат департаменти Москванинг Украина можаросига барҳам бериш бўйича позициясида ҳеч қандай ўзгариш сезмаган ва шу боис Рубио Трампга Будапештга боришни тавсия этмаса керак.

Россиянинг изоҳи қандай?

Россия Ташқи ишлар вазирлиги раҳбари Ғарб манбаларининг Путин — Трамп учрашувининг гўёки кейинга сурилгани ҳақидаги хабарларидан ҳайратда қолганини айтди. Унинг сўзларига кўра, Ғарб ОАВ ўзининг виждонсизлиги билан машҳур.

«CNN ҳам бу билан машҳур…», — дейди Сергей Лавров.

Кремль матбуот котиби Дмитрий Песков, ўз навбатида, саммитнинг аниқ саналари белгиланмаганини эслатди.

«Президент Трамп ҳам, Путин ҳам аниқ санани эълон қилишмади», — дейди Песков.

Унинг таъкидлашича, бундай даражадаги учрашувни ташкил этиш жиддий тайёргарликни ва вақтни талаб қилади.

Путин ва Трамп 16 октябрь куни телефон орқали мулоқот ўтказган ва шундан сўнг улар янги учрашувга келишиб олган. Икки соатлик суҳбатдан сўнг АҚШ раҳбари шу ҳафта Будапештда учрашув ўтказилишини эълон қилди ва россиялик ҳамкасби саммитни Венгрияда ўтказиш ғоясини қўллаб-қувватлади.

Шу йилнинг 20 октябрь куни Лавров Рубио билан телефон орқали мулоқот қилган. Улар мулоқотда Россия ва АҚШ президентларининг Будапештда бўлиб ўтиши режалаштирилган учрашувига тайёргарлик кўриш вариантларини ҳам муҳокама қилган.